元朗區內最近出現一間口碑唔錯嘅小店，店舖主打多款唔同口味嘅日式章魚小丸子，每粒小丸子都放入原隻八爪魚，真材實料。粉漿同所有醬汁亦係自己調配，小丸子外脆內軟，唔會一食落去成口粉，可以話係一間用心小店啊！
黑松露章魚小丸子
所有小丸子都會先加上沙律醬及燒汁，黑松露小丸子加上大量黑松露醬汁，醬汁用黑松露及黑松露精油製成，份量一啲都無手軟，啖啖都係黑松露香氣。
明太子章魚小丸子
主要可以食返明太子嘅原味，無經過任何調味，食得出微微鹹香，令味道更豐富，喜愛明太子嘅朋友唔可以錯過～
芝士章魚小丸子
芝士控就要試呢個芝士口味啦～加上芝士絲及原塊芝士然後再用火槍燒，食落去特別香口，仲有拉絲效果添。
更多【新店直擊】： |
蜜糖芥末章魚小丸子
蜜糖芥末同樣係人氣口味，味道鹹鹹甜甜好惹味。另外溫馨一提，因為所有小丸子都係即叫即整嘅關係，記得30分鐘內食先最好食㗎！
另外店內其他小食質素都唔錯，如香脆惹味嘅炸雞槌，仲有都受歡迎嘅海鮮冷烏冬，加入螺肉、八瓜魚、蟹柳、芝麻醬及冷麵汁，夏天食最解暑～
地址: 元朗教育路3-7號富好大廈地下9號舖
文、相、片: Yanica