每個節日都係為食貓有多個食好西食肥嘢嘅藉口。好似復活節咁，就梗係要盡情食朱古力同復活蛋啦，即刻同大家睇下今年有咩好cute好靚嘅朱古力甜品先~

朱古力小兔　Pierre Hermé

呢個來自法國嘅品牌喺復活節就推出咗多款朱古力，例如小免造型嘅黑朱古力，佢有68%可可豆成份，入口幼滑濃郁。而另一款復活蛋朱古力就提供牛奶朱古力同黑朱古力兩款選擇，分別有45%同64%可可豆，可以照顧到唔同人嘅口味。

小雞朱古力復活蛋　Marks & Spencer

想送畀小朋友嘅話呢款小雞造型牛奶朱古力復活蛋都係一個唔錯嘅選擇。賣相可愛，小朋友見到應該會好開心。而大朋友就可以揀焦糖軟心牛奶朱古力復活蛋，對奶類敏感嘅朋友都可以揀不含奶類嘅黑朱古力復活蛋，選擇夠晒多元化。

六味朱古力蛋　柏景餅店

呢款復活節朱古力蛋賣相充滿春天氣息，而口味就有六款，分別係香橙、話梅、棉花糖、益力多、海鹽同焦糖脆粒。比較少見嘅話梅味食落酸酸甜甜，感覺好特別。而焦糖脆粒味就比較香甜，入面嘅脆粒令口感更豐富。最適合同朋友開心share！

供應日期：3月24日至4月2日

甘筍香橙白朱古力慕絲蛋糕 　帝京餅店

復活節唔一定淨係食復活蛋嘅，食蛋糕一樣咁開心。好似呢款甘筍香橙白朱古力慕絲蛋糕咁，用上應節嘅甘筍做材料，再配埋香橙海綿蛋糕同香橙白朱古力慕絲，味道好清新。而蛋糕上面嘅雞仔同企鵝仔朱古力就夠晒cute，想食咩？sor，相機食先。

供應日期︰3月26日至4月8日 (*需於3天前預訂)

朱古力甜品自助餐　綠茵閣

 唔少女士去食自助餐嘅目的都係盡情食甜品，呢間酒店嘅復活節自助餐就啱晒啦。以朱古力為主題，包括有被喻為「奧地利國寶」嘅特濃朱古力沙架蛋糕、香脆朱古力泡芙同香蕉朱古力撻等。而綠茶朱古力拿破崙亦都係必試嘅，味道香濃帶回甘，又唔會太甜。

供應日期：3月30日至4月2日

文：Crystal