觀塘一向多cafe，但食物質素就予人印象一般，但係估唔到萬綠叢中一點紅，喺眾多cafe之中，行事低調、少宣傳、只做街坊生意嘅呢間cafe，甜品師卻得到英國藍帶學校頒發嘅資格。咁犀利，開飯仔當然要潮聖一番啦！

正所謂追夢不分年齡，今年只有26歲嘅Stephy自小熱愛手作法式甜品，心底一直有開自家甜品店嘅老闆夢。從英國讀書回港後，Stephy一直從事飲食PR嘅工作，平日只能喺朋友生日時先可以製作蛋糕或甜品過下手癮。但工作與內心追求嘅甜品夢背道而馳，好想趁青春瘋狂一次。

於是Stephy決定辭工，並遠赴英國倫敦嘅藍帶學校，去考取甜品師嘅資格。今年終於夢想實現，喺觀塘商廈中成功插旗，開咗第一間法式甜品cafe──Phytisserie。

Cafe主打嘅當然係Stephy拿手嘅法式甜品。首先有呢款皇牌Pavlova，兩塊玫瑰花形狀嘅法式蛋白餅，再加埋忌廉及時令水果粒，口感鬆脆，而且甜度不高，加埋好fresh嘅士多啤梨，好有層次感。

而呢一款Yuzu甜品就好受客人歡迎，入面係日本柚子醬做成嘅柚子慕絲，以及兩層薄薄嘅海綿蛋糕，柚子嘅味道好清新，令整個甜品都不致過甜。

呢一款名為Daphne嘅甜品，係由Stephy設計嘅法式甜品，以不同味道、口感、層次嘅5樣元素作為概念，令甜品有多重口感。

入面有法國啤梨醬做成嘅啤梨慕絲、海鹽焦糖慕絲、口感好soft嘅海綿蛋糕、鬆脆嘅撻底以及無糖可可碎砌出個賣相，齋聽都覺得好豐富。每個配料味道既突出，又唔會搶咗其他配料嘅口感，做得好balanced。

Cafe暫時只做午市，以5款主菜為主打，菜式不時轉換。客人可隨意選擇添加湯或沙律、甜品或飲品。呢款Golden Prawn Linguine($108)，配料有越南虎蝦、白露筍及洋蔥，並以紐西蘭牛油、鹹蛋黃碎、忌廉、雞湯煮成醬汁調味，連同扁意粉一起煮成。

鹹蛋黃嘅鹹香，令整體味道層次提升，而且扁意粉好入味，口感又夠彈牙。

至於另一款主菜Cod with Ratatouille($128)，鱈魚以麵粉、鹽、胡椒調味而煎香，灑上巴馬臣芝士後去焗，另一邊廂就以雜菜汁、番茄醬、黑醋等配料煮出雜菜。

湯水款式每隔2-3日都會轉換，採訪當日有周打魚湯，入面有自家醃製嘅鹹魚、粟米、薯仔、香草等等，再加兩塊法式牛油包，yummy。

午市以外嘅時間會用作開法式甜品班之用，每星期都有2-3班，課程價錢由$450至$700不等。廚房亦特別為教班而裝潢得寬闊啲，幾乎佔整間cafe嘅一半，而且以透明玻璃窗作間隔，畀客人睇到教班及煮食嘅情況架！

Phytisserie
地址：觀塘成業街6號泓富廣場 306室

文：Joy