台中人早餐食啲乜？市長推介美食地圖大公開！

好多人去旅行時，都鍾意拎著本旅行書搵嘢食。查實真正嘅地道美食，只有當地人最清楚。近來，台灣知名作家發表咗一篇「台中人的早餐在哪」嘅文章，引發好多對台中美食的討論。台中市長林佳龍都乘著浪潮，喺臉書post咗台中人嘅「早餐地圖」。到底台中人會去邊度食早餐呢？等開飯仔帶你行一轉啦！

Photos by Disni

雖然位於市場入面，食肆林立，依然好多人排隊。呢個蘿蔔糕＋糯米腸＋蛋係大家都推薦嘅組合，蘿蔔糕煎到恰到好處，口感細緻滑順，冇油膩感。荷包蛋未到半熟，食落好嫩口。淋上鹹鹹甜甜嘅醬料口感大為升級。

老賴茶棧

Photos by 豹紋貓

一個美好嘅清晨，點少得一杯沁涼嘅嘢飲醒醒神？呢間鋪頭主打各式各樣紅茶同奶茶。最推介係老賴紅茶同豆香紅茶，老賴紅茶係用本土茶葉沖泡，茶香濃醇。至於豆香紅茶，豆奶同紅茶就配搭得出奇地好，醇厚的豆香喺清新嘅茶氣潤飾後，更加柔順好飲。

李海魯肉飯

Photos by MissRita

睇名就知，主打係魯肉飯，賣嘅係傳統台式小食。一碗細嘅魯肉飯其實得手掌咁大嘅size，所以唔洗驚食得太滯。雖然碗細，但件魯肉就好大舊，食落軟淋淋咁，配上黏黏香香嘅醬油味，好送飯。

三代福州意麵老店

Photos by 糖糖的享食生活
主打麵食，首推呢個乾意麵，麵條有嚼勁，肉燥香氣十足，撈埋麵條後好入味，底層仲鋪滿芽菜。

力行早點

Photos by four_month

呢個傳統早餐店賣著各式包點，order個生煎包同豆沙包，加埋嘢飲港紙20蚊有找，食物抵食夾大件，尤其個生煎包煎到好香脆，入面包著好多菜，餡料豐富。

天津苟不理湯包

Photos by 豹紋貓

如果嫌就咁食包好dry，試吓湯包又如何？呢度啲湯包比平時嗰啲大幾倍，麵包皮柔軟香甜，咬落去豐富嘅湯汁一湧而上，蔥花、薑香就令豬肉嘅鮮味更加突出，台中人一朝早就食到咁嘅美食真係幸福啊～

肉蛋土司

Photos by 瘋熊的異想世界

台灣嘅肉蛋三文治咁出名點可能唔試下？首推嘅緊係呢個招牌肉蛋三文治啦，鬆軟嘅麵包夾咗醃好的烤肉同煎蛋，配以獨家調製嘅醬料同蛋黃醬，做法簡單，但味道一流。

陳記早點

Photos by 小城故事不多
係早餐放題啊～因為呢度點餐係自助形式，自己夾完嘢食先再埋單。食物方面，有煎包、煎餃、蛋餅等等，同樣係抵食之餘份量十足，好似個蛋餅咁，攤開後仲大過隻碟，要切開先食到，性價比好高。

謝氏早點

Photos by 瘋熊的異想世界

如果唔想食嚟食去都係包，嚟謝氏試吓佢嗰豆腐花都係唔錯嘅選擇。有別於香港，佢呢度嘅豆腐花混入咗花生，粒粒飽滿鬆綿，而豆花就口感綿滑，入口即溶，配上薑汁更加美味。

隨時接收最新資訊
讚好OpenRice專頁！