有留意下台灣歷史都會略略知道台灣除咗華人之外，仲有一班原住民，佢哋喺漢人移居台灣前已經喺度，過住部落嘅生活，有自己嘅語言文化。隨著時代發展，好多原住民都由郊外搬到市區生活，表面上同城市人無分別，不過有啲原住民仍然喜愛同保留傳統、自然、簡單嘅生活，亦有唔少原住民從城市搬回部落，佢哋都希望將原住民嘅故事傳承落去，所以都好歡迎外界參觀，亦會開設一啲工作坊畀大家去親身體驗原住民究竟係咩一回事。

其中位於桃園一帶嘅就有泰雅族小米園區，泰雅族係台灣第三大原住民族，周渝民、言承旭都有佢哋嘅血統，不過佢哋據點比較分散，所以園區感覺就唔算好多人。

話明係小米園區，第一樣要做嘅就係認識下小米，小米對泰雅族嚟講除咗係主要糧食，亦係神聖，耕種小米嘅過程，佢咃今年都會有唔同嘅祭典，如果你撞啱相關時間嚟就可以參與到。1月係開墾祭，好有趣，要族中長者發一個好夢去確定一塊土地適合耕作，如果惡夢就要搵另一塊地；2月係播種祭，族民會將小米糕、山肉等放到田中央祈求順利。6月係摘穗祭，係收成前長老會摘下7株小米穗，隔日再摘5株，掛喺屋上，象徵豐收。7月就到收穫祭，就係收割前嘅儀式。9月係祖靈祭，就係獻上辛勤工作所得嘅小米畀祖靈嘅時候。

明白小米對泰雅族嘅意義，就可以跟佢哋學下釀製小米酒，整個過程都雖要啲時間，族民會早一天準備好材料，將小米同糯米浸泡一晚。蒸熟後你就將小米同糯米攤開，令佢哋粒粒分明後再加酒麴，放入玻璃樽發酵封口。你帶走呢樽返屋企後幾天，仍然要觀察情況，按指示加凍水同攪動下，放到第五日到就試下甜度同酒精度啱唔口啱你口味，啱就榨汁飲得，唔啱就放多兩日。

除咗小米酒，當然仲有編織呢種民族手藝，族人會用教你點樣將兩條繩綁住喺柱就織到頭帶同手帶，上咗手其實唔難。



做咗成朝嘢，都係時候食個午飯喇，咪字，你估食飯前唔使付出，先去學鋸竹整餐具先！


好，而家真係可以開餐，先試下個蔬菜手卷，自己包自己食，有啲似越南春卷，蔬菜好新鮮加少少沙律醬調味就可以，

 

之後仲有其他主菜，小米炆豬肉（左上）炆得好腍，肉味同小米香都突出、炸小蝦就好脆口，送返小米酒最夾，小米酒飲落甜甜地但不失酒精的辣，多飲都應該易醉，量力而為好。另外原條烤魚肉質結實但仍然嫰滑。

想食飯就可以食山豬肉飯團，豬肉唔膻亦唔會肥膩，因為豬都通山跑無脂肪。仲有保身嘅首烏湯。


甜品方面都好健康，有生薑蕃薯，好得意嘅食法就係一次過咬，薑嘅辣同蕃薯甜一齊入口，好似蓄薯湯水原材料版，仲有小芋頭都好清新，無芋頭咁重味。

呢一餐令你感受到泰雅族人點樣取之自然，用之自然，食次自然，唔會加好多人工調味，自己種自己食，對土地非常尊重，簡單得嚟又好好味，同急速嘅香港生活形成強烈對比。如果你都有興趣做一日原住民，可以透過Facebook 同佢哋聯絡安排參觀。




好好Hea有機餐廳－TINA廚房

唔好以為一定要上山變返原住民先可以親親自然，去返市郊附近都有好多選擇，好似呢間有機餐廳，都開咗成廿年，而家仲好多分店。呢度淨係面積都非常大，有一個花園可以放狗、畀小朋友玩，什至影婚照，另外，佢自己會有一塊田從事有機耕種，台灣政府會定會抽驗給予認證，所以蔬果質素有保證。種完嘅蔬果同花會拎去畀佢哋嘅餐廳烹調菜式同整花茶。

入返餐廳用餐，港警約$120到肯定食到飽飽，先食手工麵包，再可以去有機沙律吧無限食沙律＋無限飲湯＋無限食前菜，然後就可以享用主菜，有十幾款揀。
 

普羅旺斯香料蜜糖芥末烤豬腳唔油膩，夠蜜味，肉質保持膠質彈性；脆皮雞都好大隻，本身味唔算好重，點返啲花椒胡椒鹽比較好；炆筍紅燒肉好入味，肉同筍都好嫰，啲汁可以送飯（都係無限添食）；麻辣水煮魚反而唔覺好辣，但魚就幾滑；酸辣椒麻炸雞扒炸得脆但唔會好乾身，點埋啲酸辣汁都幾香口。


食完仲可以無限食豆腐花（有芋圓 Yeah)同糖水，另有甜品同餐飲，芝士蛋糕同朱古力蛋糕入口都軟滑同濃郁。你話咁多嘢食百幾蚊係咪真係超抵？



臨走之前仲可以去餐廳旁邊嘅麵包店買佢哋有機麵包，有好多餡料如南瓜、咖啡核桃、紫米芝士、芝麻紅豆等，仲有好多麵包醬，特別推介牛奶奶酥同手工蒜味牛油，都係好香好濃厚奶味。

除此以外，仲可以買由有機農地每日新鮮直送嘅有機菜同其他有機食品，包括咖啡、五穀、花果茶、果乾等等。送畀朋友做手信都相當有桃園特色，一種天然舒服嘅感覺。

隨時接收最新資訊
讚好OpenRice專頁！