近年粵式點心推陳出新，從賣相到食材都千變萬化。旺角呢間新店同樣主打點心，由前喜來登酒店天寶閣總廚陳小麒師傅主理，既有傳統古法點心，亦有部分加入創意元素，唔少都係坊間少有，就連蒸籠都係搶眼嘅粉紅色！
 

點心廊嘅理念係「點心與藝術意形合一」，由陳小麒師傅親手畫嘅水墨畫放到糅合日室茶室風格嘅裝修當中，無突兀感又特別。另一個心機位係蒸籠係用紅菜頭人手染色，所以唔使驚會食到人造色素。
 

創作六式拼盤（$198）

想食齊各款招牌創意點心，嗌呢個創作六式拼盤就啱晒，六款精緻鹹甜點心各有兩件。蒸籠裡面嘅係海膽鳳眼餃同金箔墨汁蟹粉鮮蝦餃，前者係皮薄餡靚嘅鳳眼蝦餃上加上海膽刺身，後者用墨汁餃皮包住彈牙鮮蝦粒同濃香蟹粉，兩款都好有鮮味。
 

另外四款點心亦各有特色，黃金啤梨鹹水角係可愛嘅迷你啤梨狀，糯米皮煙韌香脆；原隻鮑魚雞粒酥有鮑魚鋪面夠貴氣，鮑魚亦非常入味；一口燕窩撻嘅燕窩落得重手，微甜燕窩同蛋撻味道幾夾；黑白芝麻流心煎堆仔嘅流心效果好吸引，芝麻香十足不過略嫌煎堆皮太厚。
 

流心鵪鶉蛋燒賣（$48）

懷舊鵪鶉蛋燒賣同樣可以創新：將細細粒嘅鵪鶉蛋變成流心！秘訣係要先浸冰水再放熱水，最後同蝦肉餡一齊蒸熟。鮮爽嘅蝦肉當中加入鵪鶉蛋嘅甘香，鵪鶉蛋黃嘅流心效果雖然無雞蛋咁明顯，不過依然食得出軟心口感。
 

黃金海膽春卷（$78）

另一款創意配搭嘅點心作品，春卷外面金黃香脆，裡面嘅餡料係選用體型較大嘅蝦，蝦肉粒粒彈牙。面頭放上馬糞海膽，唔單止鮮味加倍，柔軟嘅海膽亦增加咗口感層次。另一加分點係春卷夠乾身毫無油膩感，配埋沙律醬更香口。
 

蜂巢芋角帶子盞（$48）

經典點心亦突顯出師傅功架，呢碟蜂巢芋角帶子盞一睇就知道夠酥脆，外面嘅蜂巢口感輕盈酥脆，入口即化。裡面嘅芋蓉亦軟滑帶甜，加埋煎至微焦嘅帶子，外脆內軟。
 

沙嗲海龍皇煎米粉（$128）

飯麵亦非一般酒樓行貨，古法煎米粉爽口又保留一絲絲口感，配沙爹醬煮海鮮更香口惹味。沙爹醬微辣，魷魚、蝦等海鮮爽滑彈牙。細心位係醬汁係另上，令煎米粉可以保持香脆。
 

順德倫教糕（$38）

睇個名未必知係咩，其實就係大家細細個食開嘅白糖糕，因為有傳係由順德倫教一個小販發明嘅。坊間唔少白糖糕都會因為過度發酵而變酸，呢度嘅倫教糕酸味適中，唔會蓋過白糖嘅甜味，口感鬆軟彈牙。
 

（左）黑金剛（$32），（右）金菠蘿（$48）

除咗茗茶，亦可以選擇唔同凍熱特飲。黑金剛係特級陳皮煲可樂，陳皮片保留香氣，而陳皮碎畀大家搞勻飲用嘅時候可以更容易品嘗到果皮香。金菠蘿係羽衣甘藍菠蘿汁，菠蘿嘅酸甜減低羽衣甘藍嘅草青味，健康又易入口。
 

XO醬一口蘿蔔糕（$48）

韮王滑蛋鮮蝦腸粉（$68）

點心廊
地址：旺角彌敦道639號雅蘭中心2樓201號舖

文：Cathy
相、片：Tom Li