九龍區嘅咖啡店真係越開越多，呢間就喺何文田，門面同裝修都以純白為主非常好認。裝修加分同時咖啡都有水準，所有咖啡都可以揀自己鍾意嘅咖啡豆，單係House Blend都有兩款，仲不時有唔同單品豆。主菜同輕食亦有日式同西式多款選擇，特別係蛋糕好有驚喜！
 

Five To One位於勝利道，裝修以白色為主，配搭水泥、木等質感，雖然地方唔算好大但感覺相當舒適。供應沙律、多士、烏冬、小食、甜品、咖啡及其他飲品。
 

胡麻醬炸軟殼蟹、蟹肉及飛魚子冷烏冬（$108）

分量十足嘅主菜，炸軟殼蟹香脆唔油膩，上面仲特別加咗香濃蟹膏，增添鮮味！而蟹肉同飛魚子亦落得夠重手，味道同口感都好豐富。冷烏冬特別揀咗比較幼身同煙韌嘅稻庭烏冬，配搭香味突出嘅胡麻醬相當醒胃。
 

碎蛋沙律及吉列豬扒多士（$78）

負責人希望將一啲佢之前喺日本咖啡店試過嘅元素帶過嚟，所以就有呢個坊間少見嘅吉列豬扒多士配搭。豬扒厚度適中而且炸至外面金黃香脆而肉質保持軟嫩，同帶淡淡麥香嘅農夫包配搭起嚟估唔到又幾夾。加上酸甜嘅他他醬解膩，碎蛋沙律就可以增加口感層次。
 

不明蛋糕（$48-55）

甜品當中有呢個不明蛋糕，其實係每日都有2-3款唔同口味，好似開飯仔拍攝當日就有呢件檸檬撻。檸檬餡軟滑柔順，酸度適中而且有檸檬自然清香。撻皮薄身鬆脆，帶牛油香。
 

被抹茶淹沒的雪糕（$48）

即係抹茶版嘅Affogato，抹茶醬選用京都抹茶粉，茶香濃郁味道微苦。配搭雪糕就可以中和苦澀，味道香甜又唔會蓋過抹茶茶香。
 

拿鐵咖啡（$44/熱，$45/冷）

所有咖啡都可以自選咖啡豆，採訪當日有三款選擇：Blend 1 - Fruity、Blend 2 - Nutty，同SOE - Floral & Fruity。前兩款係請本地烘焙品牌為小店拼配同烘焙嘅House Blend，Fruity會有布冧、紅糖風味。而Nutty就會有烤過嘅果仁香味，建議配牛奶例如沖成拿鐵，味道平衡而且尾韻帶甜非常討喜。

而SOE會按季節更換，採訪當日係一款埃塞俄比亞豆，入口會有花香同香茅香，中段係莓果酸甜味，建議飲手沖咖啡或者凍拿鐵咖啡嘅時候可以揀呢款豆試下！
 

鮮菠蘿梳打（$42）

唔飲咖啡亦有朱古力、梳打等選擇，呢杯鮮菠蘿梳打係用新鮮菠蘿肉加蜂蜜自家製作嘅菠蘿醬加上氣泡水調配，氣泡都幾多所以另附一小杯氣泡水，飲到一半無晒氣泡就可以自己添加，好貼心！飲嘅時候會食到一絲絲菠蘿果肉，味道清爽天然。
 

Five To One
地址：何文田勝利道6號地舖

文：Cathy
相、片：Tom Li