Happy Friday想去飲返幾杯，老蘭以外都仲有好多選擇！堅尼地城有間新開嘅餐廳，設有成個釀酒區喺埋度，大部分嘅嘢食亦加入啤酒元素入饌，畀酒迷過足癮。

香港精釀啤酒品牌Gweilo有份開設呢間餐廳，一入到去已經會見到一排巨型釀酒桶，唔係裝飾嚟架，堅架，品牌會喺度釀酒，進行新款式研究同測試，遲下亦計劃會開辦釀酒工作坊，等大家都有機會見識下釀酒過程。

 Burrata芝士沙律

既然呢度係啤酒廠同餐廳集於一身，食物同啤酒當然亦係二位一體，連啲嘢食都有啤酒嘅成分。Burrata芝士沙律配蕃茄、蜜瓜，芝士口感軟滑又creamy，同蕃茄、蜜瓜確係幾夾。不過呢碟嘅精髓喺個汁醬度！加入口感較清爽嘅lager啤酒調製出嚟嘅油醋汁同辣醬，微微辣同時帶嚟清新感。

 慢煮牛面頰肉配Stout啤酒骨髓批及薯蓉

賣相不俗嘅慢煮牛面頰肉配Stout啤酒骨髓批及薯蓉，睇個名就知混入咗烘烤麥芽味較突出嘅黑啤，Stout製作。師傅將牛面頰肉同Stout一齊慢煮8個鐘，再用酥皮包住，插埋骨髓喺中間再放入烤箱煮廿分鐘，肉質軟腍，麥芽嘅甜香亦靜悄悄地喺度刷一下存在感。

 羅馬傳統Pinsa薄餅 - Carbonara

至於羅馬傳統Pinsa薄餅，雖然就咁望落好似冇咩料又冇咩特別，但同人一樣，不可貌相呢。麵糰以啤酒原材料之一嘅酵母、小麥粉、大豆粉等製作，經低溫發酵至少48個鐘，再喺烤爐高溫烤製而成。脆邊嘅Carbonara薄餅放有兩種芝士，包括Mozzarella同Pecorino，加埋Guanciale風乾豬面頰肉同蛋黃，陣陣鹹香。

 甜度極高嘅朱古力撻配開心果雪糕，中間係麥芽黑朱古力軟心

主角要登場啦！餐廳總共有24個Tap頭，除咗Gweilo自家釀嘅啤酒之外，另外都會有其他本地同外國酒廠嘅酒款，仲有幾個係雞尾酒龍頭嚟添。

 Sudoku Golden Stout(左)、Blackberry Crème Brulee Sour (右)

依家天氣日日都三十幾度，行幾步已經滴晒汗，飲返杯酸啤就最爽。新推出嘅Blackberry Crème Brulee Sour值得一試，以麥芽汁製成吉士凝乳，再加入黑莓蓉、楓糖糖漿同雲呢嗱，莓香味突出，酸酸der，收尾帶微甜。Stout都唔一定係黑色嘅，Sudoku Golden Stout呈琥珀色，未飲就已經聞到濃濃嘅烘烤麥芽香味同咖啡味， 反而飲落嘅味道冇聞到嘅咁重，喺甘苦嘅咖啡味中亦滲有甜甜嘅朱古力同雲呢嗱味。

Gweilo自家出產嘅Gin酒果香同柑橘香突出，調成Gin & Tonic後依然散發出陣陣清新果香。

GRAIN
地址: 西環堅尼地城北街4-8號五福大廈地下1號舖

文：Kar
相、片：Tom Li