咖啡迷又有新店可以試啦！堅尼地城呢間主打單一產地咖啡，所有咖啡都用同一款單品豆，但就可以揀唔同沖煮方法，去呈現唔同風味，而且定期按主題更換咖啡豆，每次試都會有驚喜。輕食同樣有水準，甜品控必試窩夫呀。
 

For Single位於堅尼地城港鐵站附近，係元朗CoHee Studio嘅姐妹店。店名係指佢哋嘅兩大主打：Single Origin Coffee（單一產地咖啡）同Single Malt Whiskey（單一麥芽威士忌）。相信唔少咖啡迷一開始接觸精品咖啡嘅時候，對咖啡產地嘅特色可能只係略知一二，所以For Single就會定期挑選一款單一產地咖啡同大家做深入介紹。
 

Espresso Combo Set

Combo Set係一杯Espresso同一杯Milk Coffee，同一款豆同樣而且都係用咖啡機萃取，但有無牛奶都會有唔同風味。新店開張第一款豆就揀咗埃塞俄比亞谷吉日曬豆，Espresso花香突出，有菠蘿嘅酸甜味。Flat White甜度提高，有莓果嘅甜味，後韻帶少少果仁香。
 

AeroPress Coffee

沖煮方法仲有V60手沖、虹吸、冷泡等，開飯仔就揀咗坊間較為少見嘅AeroPress。同樣用埃塞俄比亞谷吉日曬豆，用AeroPress沖出嚟偏茶感，風味乾淨，有蘋果嘅甜味。
 

印住沖煮方法嘅卡背可以畀大家就濕香（Aroma）、甜度（Sweetness）、酸度（Acidity）、醇厚度（Body），同平衡度（Balance）評分。亦可以寫低少少Tasting Note，可以作為記錄，亦方便大家比較同一款豆唔同沖煮方法嘅唔同風味！
 

 

Crab Combo Sourdough（$138）

Cafe亦有供應輕食同甜點，Crab Combo Sourdough有炒蛋、松葉蟹肉同牛油果鋪面，配料多到就嚟睇唔到塊包！嫩滑嘅炒蛋同Creamy嘅牛油果固然係絕配，加埋鮮味十足、一絲絲嘅蟹肉又夾到。而且Sourdough係選用黑麥酸種麵包，食落有穀物顆粒同黑麥香，層次更豐富。
 

Lemon Sorbet（$68）

原個檸檬挖空，釀入白色嘅檸檬雪芭上枱，估唔到食落唔會太酸太冰，反而口感軟綿，輕盈得嚟又無一粒粒冰粒。檸檬香氣自然，先酸後甜而且唔嗆喉。飲完咖啡食呢個清洗味蕾都係個唔錯嘅選擇。
 

Honey Mascarpone Cream Waffle（$68）

Tiramisu常見嘅Mascarpone Cheese今次用嚟配搭窩夫，窩夫係偏比利時風格，口感厚實較硬，味道都比較甜。所以用奶香濃郁、軟滑帶微酸嘅Mascarpone Cream嚟平衡返，再加上酸酸甜甜又多汁嘅士多啤梨同藍莓，整體甜而不膩。
 

之後夜晚會供應單一麥芽威士忌，第一個主題會係酒桶，皆因酒桶係威士忌熟成品質同風味最重要嘅因素！無論係想嚟放鬆一下，定學更多威士忌知識，呢度都可以滿足你。
 

想了解更多咖啡豆產地、莊園、處理法嘅介紹等，可以留意小店嘅Coffeepedia展板，或者Scan卡上嘅QR Code去網站慢慢睇。
 

For Single
地址：西環堅尼地城厚和街6-18號滿發大廈地下D號舖

文、相：Cathy