報告大大！呢個主題樂園今日突然多咗好多嘩鬼出沒，仲有好多米奇樣嘅南瓜同惡人花車巡遊呀。哦~~原來係哈囉喂派對又開始喇！Wow~ 不過玩咗成日，鬼死咁餓，梗係要食返個大餐啦~ 又或者，喺街邊嘅小食亭、餅店買住啲小食頂住先都得，反正都係一樣咁鬼得意。

美國小鎮大街 - 市集餅店

麵包同甜品都換上萬聖裝，變晒做阿Jack同鬼怪朋友，仲有血絲眼球，造型精美。

戶外小食亭

阿Jack牛油曲奇餅同米奇南瓜鬆餅，都係可愛多過驚嚇，係唔捨得咬第一啖嗰隻。

幻想世界 - 皇室宴會廳

呢杯cupcake都好cute cute，係木乃伊嚟呀。喺幻想世界入面，果然係要加多少少幻想先得。

美國小鎮大街 - 大街餐廳

呢間餐廳就聯乘咗可口可樂推出萬聖節套餐，主菜單包括有三文魚、牛肉等，碟碟都有隻蝙蝠喺度守護住。

廣場飯店

廣場飯店亦設有萬聖節宴，包括有「血湯」鮮茄海皇羹、「魅影南瓜頭」鮮百合翡翠南瓜盅、「幽冥森林」黑芝麻蜘珠蝦丸配海鮮炒飯，同埋「幽靈之眼」甜品，即係椰汁奶凍，仲有杯用骷髏頭裝住嘅蕃石榴溝奇異果溝火龍果溝士多啤梨嘅特飲。

迪士尼探索家度假酒店 - 芊彩餐廳

酒店餐廳嘅晚宴都唔嘢少啊。有水煮薄切蝦片配海鮮沙律、周打雞肉栗米湯、香煎芝麻三文魚配菠菜汁等等，甜品造型仲勁，好神似，係盗墓者慕絲脆餅配香芒熱情果醬。
（供應日期：10 月 20 – 21、 27 – 31 日）

迷離莊園 - 大冒險家餐廳

壓軸要介紹嘅，係可以一路食一路玩，仲有魔幻節目睇嘅大冒險家餐廳。探險家米奇、米妮、唐老鴨同高飛會帶埋魔術師、神秘學者、預言家、樂師嚟到餐廳，同各位嘩鬼玩遊戲、尋寶藏，當然都可以同佢哋影相啦~ 但唔好掛住玩唔食嘢喎，有海鮮拼盤、三文魚酥（粒阿jack蝦餃相當過癮）、燒春雞，仲有三層架甜品食呀。BTW，早啲訂枱仲有早鳥優惠呀，早5日，有85折呀。

文、相：Kar