港式傳統扒房 哥登堡餐廳
Photos by mama-gugu
或者每個舊區都總有一間有供應抵食夾大件扒餐嘅餐廳，而土瓜灣嘅代表就係呢間裝修有花樣年華感覺嘅哥登堡餐廳。港式豉油西餐雖然唔夠正宗，但勝在平實，例如羅宋湯係細個飲嘅味道：熱辣辣上枱，酸辣有致越飲越開胃。肉醬意粉就係大大碟嘅茄汁燴意粉，再加焗過嘅芝士肉醬。扒餐亦有相當水準同分量，而且見返三色豆同波浪粗薯條做配菜，童年回憶即刻返哂嚟。
真五十年不變 世紀椰汁
Photos by annielwy
呢間椰汁店睇落就好新，其實連埋前身喺六十年代就開業嘅禮記就有四十幾年歷史。難得嘅係老闆依然沿用當年上一代嘅秘方，每日將椰肉加冰、淡奶同椰水打成椰汁再隔渣，椰香十足冰爽解渴，有食客形容個味道有如初戀一樣清新。而且手工即榨口感比一般椰汁更濃厚順滑，更飲得出貨真價實嘅美味。
無得輸京式煎餃 巧興麵食店
Photos by hphbhk1984 & 技巧樹熊
呢間老店喺土瓜灣可以話係相當有名氣，無他嘅，老闆夫婦都係北京人，自家制餃子同雲吞全部真材實料，先吸引到街坊都經常嚟食。餃子有韭菜、牛肉、三鮮、白菜冬菇四款口味，湯餃得煎餃亦得。通常街坊都會推介煎餃，因為比較厚身嘅皮煎完之後變得香脆，包住Juicy餡料，記得點埋佢地帶蒜頭嘅臘八醋，無得輸！菜肉雲吞同雞絲冷麵亦係推介。
本土盅頭蒸飯 明珍美食
Photos by Jamel果占苗
好嘅嘢有時係貴精不貴多，例如呢間港式餐廳有小菜亦有點心，但最出名嘅係佢地嘅蒸飯！一個個盅頭放落大蒸籠裡面蒸，Keep住熱辣辣。招牌菜係鳳爪排骨飯，軟腍入味嘅鳳爪、肥瘦適中嘅排骨，再加吸收哂肉汁嘅白飯，唔洗加豉油都已經夠好食。難怪唔少街坊甚至的士司機都特登嚟呢度開飯。
平民上海老菜館 上海美華菜館
Photos by floraxy
對唔少老一輩嚟講，簡單一碗鹹豆漿同粢飯已經係相當豐富嘅早餐，呢間老店嘅豆漿同粢飯就有唔少食家推介。鹹豆漿由老闆親自出馬沖，將熱豆漿沖到放咗鹽、蝦皮同葱花嘅碗裡面，再加少少油同油炸鬼碎，香滑順口。粢飯亦係新鮮包，返炸過嘅酥脆油炸鬼、香噴噴肉鬆、惹味榨菜同軟硬適中嘅糯米配搭比例得宜，係多年累積落嚟嘅經驗。豆漿同粢飯供應到早上十一點，之後去到亦可以一試小籠包同鍋貼，晚市就只有小菜。
街坊至LIKE南乳雞球 譽麵坊
Photos by 寧若曦
呢間只以一碗南乳雞球米線就足以獨步成個土瓜灣，加咗鹹香南乳炸至金黃色嘅雞球同米線分開上保持脆卜卜。雞球咬落炸漿薄得嚟又夠香口，雞肉嫩滑，係區內唔少學生同街坊至LIKE嘅出品。而且米線亦一啲都唔Hea，湯底清淡唔係一般味精湯，加埋雪菜簡單但滿足。唔鐘意食米線亦可以轉撈粗麵。另外酥炸墨魚餅亦足料彈牙，唯一要擔心嘅係食得炸嘢太多會喉嚨痛，嗚嗚。
新店傳承老香港風味 老三油渣麵王
Photos by 西打哥
相比其他老店，呢間小店可以用小朋友嚟形容，但佢賣嘅係傳統嘅老香港風味：豬油渣麵。唔好以為豬油渣無乜特別，佢係呢碗麵嘅靈魂，要比心機炸透先有金黃蓬鬆、香脆唔油膩嘅效果。沾上熱嘅蘿蔔湯更能散發香味，加上惹味辣菜甫同上海粗麵，係令人忘記卡路里一啖接一啖食落去嘅誘惑。不過記得留意餐廳星期日休息，唔好特登去但摸門釘啦。
罕見炭爐火鍋燒烤 鴻福海鮮四季火鍋
Photos by 甜三點
打邊爐你會用咩爐？Gas爐定電磁爐？有無見過有人用炭爐打邊爐？我見過，開飯仔我真係見過！土瓜灣呢間大排檔就係用炭爐，人夠多嘅話不妨一邊打邊爐一邊燒烤，咁就可以一次過食到海鮮嘅唔同味道。不過去嘅話記得注意炭爐味道比較大，而且巷裡面嘅大排檔環境自然比一般餐廳爭啲，但風味就只此一家。
隨時接收最新資訊
讚好OpenRice專頁！
