去酒家炒小菜，會畀人貴嘅感覺，但「民間」都有其他選擇嘅～好似呢幾間就有麻甩味嘅小店，亦有曾獲米芝蓮推介嘅精品小館啊。

必食鐵板黑椒豬手 大中華飯店

圖：littlefoodielandhk、kuromi-23

今個月底搬舖喇～大家唔使怕新舖難揾，因為係同舊店同一條街，但新店可以冇咗嗰種「舊」嘅風味，想打卡懷念就要把握時間喇。啖啖肉之選有鐵板黑椒豬手同原隻土匪雞，前者鐵板好夠熱，淋上香濃嘅黑椒汁即刻「滋滋」聲；後者皮脆嫩滑，唔會過多油脂，一班人share食啱晒。

煲仔飯配小菜 坤記煲仔小菜

圖：chungchungcoco

平時一講呢間必比登推介餐廳，好多人都會諗佢嘅煲仔飯，但其實小菜都係佢嘅賣點之一。好似佐酒必點嘅椒鹽九肚魚，炸得酥脆，火候啱啱好，而椒鹽鮮魷就彈牙有咬口；另外熱辣辣嘅薑蔥魚腩煲就夠入味，送飯啱晒～

雅致小館精品菜式 合時小廚    

圖：rbylife、heidicht

曾經連續兩年獲得米芝蓮推介嘅中菜館，菜品精細啲，裝潢雅致，環境亦較為舒服。佢嘅菜式偏向酒家風格而不失獨特性，其中薑蔥焗肉蟹煎腸粉，薑蔥爆得好香，蟹身吸收其香氣，入口更加滋味。而焗少爺豬扒飯記得先影拉絲效果呀～鬆軟嘅豬扒配甜甜酸酸嘅番茄汁特別開胃。

文：Cathy