唔少香港人都鐘意食芭菲，貪其味道同口感層次豐富，如果加埋時令日本水果，咁就更加無得輸！尖沙咀最近開咗間裝修白色為主嘅芭菲店，原來係嚟自東京嘅甜品名店，可以坐喺吧枱前欣賞師傅點整出一杯杯色彩繽紛嘅鮮果芭菲呀。
 

成城 Fruitier係日本過江龍，本店係東京甜品名店Seijo Fruitier。而香港第一間分店坐落於尖沙咀，有由日本總店嘅遠道而嚟甜品師傅坐鎮。白色主調加上雲石枱簡約討喜，亦啱哂要打卡或者相機食先嘅為食友。最特別嘅係唔單止有開放式廚房，仲係以吧枱座位為主，大家就清楚見到每一杯芭菲嘅用料。
 

草莓魅惑（$128）

芭菲口味以水果為主，分別有不定期更換嘅季節特選，同長期供應嘅本店推介。另有方便外賣嘅甜品杯、切餅同糕點。冬天係食士多啤梨嘅季節，當然唔少得嚟返杯士多啤梨芭菲！尖沙咀店同日本本店一樣選用九州福岡嘅「甘王」(あまおう)士多啤梨，大粒飽滿而且色澤紅潤。
 

不過呢次開飯仔食到嘅士多啤梨就唔算非常甜，部分仲帶酸，勝在非常Juicy，點忌廉食依然唔錯。原來呢度嘅忌廉係選用北海道乳脂量達40%嘅忌廉，難怪食落牛奶甜香十足。而底部嘅士多啤梨醬同荔枝啫喱亦相當清甜，加埋中間嘅Mövenpick雲呢嗱雪糕同海綿蛋糕整體平衡唔錯。
 

七彩成城（$78）

而貪心啲想試多幾款唔同水果嘅話，呢杯鮮果芭菲就最啱你喇。部分水果係長期供應，好似奇異果、士多啤梨、芒果等，再配時令水果，例如之前嘅無花果同最近嘅巨峰提子等。再加檸檬啫喱、忌廉、海綿雪糕組成。
 

呢度大部分水果都係日本進口，全部都香甜多汁，特別係芒果！今次一樣建議加埋輕柔嘅忌廉一齊食，因為點雪糕食就略嫌過甜，雪糕都係留返配檸檬啫喱或者海綿蛋糕一齊食會夾啲。
 

鮮果忌廉切餅（$58）

除咗芭菲之外，呢度嘅鮮果忌廉切餅同鮮果吉士泡芙亦係堂食之選，因為上枱嘅時候會用醬畫上可愛圖案，保證令人少女心大發立刻自拍多幾張相！蛋糕裡面係吉士醬同鮮果粒，鮮果種類同樣係時令選擇，所以過多一段時間再去可能會有新驚喜㗎。
 

 

迷你栗子芭菲（$58）

蘋果紅茶芭芭露亞（$58）

而如果要外賣嘅話就可以選擇迷你芭菲杯，呢兩款都係季節限定嘅推介。迷你栗子芭菲選用日本富有柿配以日本糖漬栗子，係屬於秋天嘅香甜口味。而蘋果紅茶芭芭露亞就用日本青森蘋果同英國Twinings茶葉，喺鮮果嘅清甜當中加上一份紅茶餘韻。
 

思加丁（$248/盒）

最後如果想送禮嘅話，呢度亦有由日本直送到店嘅糕點，呢盒思加丁(Engadiner)就係甜品師傅嘅推介，充滿合桃同焦糖香。仲有法式水果蛋糕、焦糖杏仁脆餅等同Gift Set選擇。
 

最後溫馨提示一下想去食芭菲同甜品嘅朋友仔，如果有食物敏感嘅話建議先向店員查詢。舉個例子就係佢地嘅迷你栗子芭菲同洋梨焦糖慕斯甜品杯其實都有落到酒，如果對酒敏感或者小朋友嘅話就建議可以食返完全無酒精成分嘅，例如迷你芒果芭菲咁。而呢輪嘅季節限定芭菲同甜品杯預計供應至出年1月底至2月，想試就記得留意返啦。
 

成城 Fruitier
尖沙咀堪富利士道6-6A號地下

文、相、片：Cathy