人離鄉賤，原本從事時裝生意嘅楊生由潮州初到香港，深明兩地時裝潮流嘅大不同，於是毅然改為拎起鑊鏟，煮出由細食到大嘅家鄉菜。十年前喺葵芳首次開店，招牌潮式腸粉深得區內食客歡迎，其後老闆再喺元朗開店。直至租約期滿，舖頭今次終於肯搬出九龍。

「選擇喺太子開店，主要都係想方便熟客。好多熟客都住喺港島區，每次要幫襯都特登走入元朗，都幾不便。」老闆楊生除咗希望畀客人品嚐家鄉潮洲味道之外，亦感受到「家」嘅氣氛，所以舖頭用嘅都係家庭式圓枱，好啱一家大細嚟開餐。

招牌鮮蠔腸粉($58)，腸粉做法同廣東腸粉相似，但呢款潮州腸粉會有冬菇、蝦米、土魷、雞蛋、芽菜、生菜等等，再加埋客人點選嘅蠔仔或豬肉等配料，非常豐富。如果唔鍾意食蠔仔嘅話，另有鮮蝦、魚片、豬肉、肥牛，甚至素食腸粉選擇架！

招牌鮮蠔腸粉

腸粉皮做得好薄，裏面啲配料都隱約見到，口感又香又滑溜。

而醬汁亦非一般豉油，係以五香粉、豉油、豬骨湯及蒜蓉煮成，味道惹味微鹹，同腸粉好夾。

居然用牛皮做主打嘅呢道鄉下帶皮黃牛肉煲($238)，可能連「架己冷」（潮州同鄉）都好少食，喺香港亦好少見。用兩歲幾嘅潮州黃牛牛皮，連同花椒、八角、豉油、辣椒、薑等配料一同炆煮兩個幾鐘，炆到牛皮至軟腍。

鄉下帶皮黃牛肉煲

每塊牛皮都好大塊，分量亦多。一咀嚼就感覺到濃濃嘅「骨膠原」，味道帶點微辛，無乜牛膻味。牛皮以外，仲有少許牛腩及支竹，值得一試！

招牌炒粿汁($75)，粿汁其實即係粉皮，係用米漿、番薯粉拌勻，然後倒入平底鑊煎成一塊塊， 再切成四邊形就做成。

潮州人多用好似魚蛋粉煮法咁湯煮粿汁，不過老闆就認為炒粿汁口感更佳，於是用潮州扎肉、芽菜、豉油、麻油等配料，連同粿汁一齊炒。

既有濃郁嘅鑊氣，食落亦惹味啲。不過要趁熱食，由於粿汁成分有番薯粉，攤耐咗會黐埋一齊，影響口感架！

招牌炒粿汁

乒乓波豬肉筋丸湯($78)，能夠將乒乓波咁大嘅肉丸整得彈牙又有嚼頭，仲要肉丸味濃，都真係幾難架！

乒乓波豬肉筋丸湯

豬肉筋丸來自老闆喺國內從事肉丸生意嘅大哥，用瘦肉打至起膠再造成乒乓波咁大嘅size。肉丸絕不加入肥豬肉以免影響口感，而且不加化學劑、防腐劑。一碗有5粒，無論男仔定女仔食都肯定飽肚。

新出嘅沙茶花甲麵湯($68)，以潮州惹味沙茶醬，加埋花甲、麵條而煮成。

沙茶花甲麵湯

花甲每日從本地街市購買，難怪蜆肉咁大粒，亦覺鮮甜。麵條從家鄉到港，滑溜得嚟又好掛湯。

地方比元朗舊舖寬敞，而且貼滿餐廳嘅驚人「戰績」，除咗有多間本地飲食雜誌嘅採訪剪報，仲連續5年獲得米芝蓮指南推介餐廳添！

潮式腸粉家菜館
地址: 太子花園街224號地下A號舖

文：Joy