壽司郎又開分店喇！今次唔係壽司店，而係居酒屋呀！全球首間海外分店將會8月3日喺灣仔開業，新店舒適光猛，除咗主打多款充滿創意同玩味嘅美食外，更有多款日本酒選擇，重點係CP值同壽司店一樣咁高，可以預視到即將又有一條人龍要誕生。

 渾身是膽三文魚子軍艦 ($58)

 魚子醬壽司 ($38)

壽司郎開嘅居酒屋，當然都會有壽司供應啦。餐廳以黑醋同意大利香醋調配壽司醋，增加米粒之間嘅粘性，同時突出魚生嘅鮮味。其中，三文魚子多到滿瀉嘅渾身是膽三文魚子軍艦，同埋好似成盒魚子醬咁嘅魚子醬壽司都係必點項目。前者入口既有鹹鮮，亦有甘醇感覺；後者更係內有乾坤，嗶起一匙會發現，原來鹹香嘅魚子醬下，係有層薄薄嘅吞拿魚蓉同埋壽司飯！

至於乾杯三文魚 ($38)，則係日本嗰邊嘅人氣Top 3 壽司之一。就咁睇同普通三文魚冇乜分別，但食落就知。餐廳使用秘製方法，三文魚入口即溶，好似飲緊嘢咁。下次嚟cheers，唔拎酒杯，拎住呢道三文魚都得。

 稱霸四海刺身盛（吞拿魚赤身、漬鯖魚、油甘魚、鯛魚） ($76)

餐廳另外主打多款創意居酒屋美食，首先介紹一款香港限定嘅菜式——霧鎖玉龍藏仙山 ($68)，聽個名完全冇頭緒係咩嚟？打開點心蒸籠，原來係原條又長又肥美嘅海鰻包住玉子燒，再配山藥泥。海鰻帶有陣陣魚香，一啖放晒入口，層次相當豐富。

杉玉薯仔沙律 ($48) 由擺盤到食材配搭都盡見心思，將一首本嚟簡單平凡嘅薯仔沙律，變成一道啱晒打卡又有玩味嘅菜式。薯仔沙律混合咗切碎嘅甜醋薑、蝦乾、青海苔粉等，再包多隻雞蛋喺中間，然後做成杉玉球嘅外形。撈勻食嗰陣，除咗食到有脆粒外，仲有陣陣濃郁嘅紫菜香同埋微微辣。

唔好以為鮟鱇魚肝就一定會好重口味，呢道作為開胃前菜嘅炙烤鮟鱇魚肝拌柚子醋啫喱 ($38) 就滿有驚喜嘞。雖然賣相唔算話太靚，但味道配搭扳回分數。炙烤過嘅鮟鱇魚肝油香突出，連埋微酸嘅柚子醋啫喱一齊食，則可互相中和，清新醒胃，食完一匙忍唔住又要食多匙。

 赴湯蹈火的蘿蔔（即係關東煮蘿蔔天婦羅） ($38)

睇到呢度嘅讀者，介紹返個隱藏Menu配搭畀大家！羅勒醬蒜香橄欖油煮魷魚番茄（配法包） ($48)雖然係西班牙菜式，但呢度一樣有得食。成道菜一上枱就已經超香，脆口嘅法包點完油香後，識食嘅一定要追加隱藏配搭——「一拍即合‧香氣四溢油拌麵」 ($28)！將剩下嘅醬汁倒入拌麵中，令每條麵條都索晒羅勒蒜汁，食落就夠香口，而且又唔會嘥咗個汁。

嚟居酒屋點可以唔飲酒？餐廳有超過20款日本酒供應，更特別推出「品酒序」，每月挑選3款唔同嘅Sake，畀大家可以一次過試到3款口味。今個月率先可試嘅3款sake分別係香醇溫和嘅杉玉、果香滿滿嘅冩楽，同埋優雅嘅大吟釀黑龍。

杉玉
地址: 灣仔軒尼詩道256號The Hennessy地下B及C號舖
預計開業時間：8月3日

文：Kar
相+片：Tom Li