日式壽喜燒可以話係其中一款有代表性嘅甜鹹系食物，香甜嘅醬汁配上濃香嘅牛肉，難怪唔少人都係fans！今期搵咗幾間近大半年先開嘅壽喜燒專門店畀大家，有關東同關西風，睇吓邊間啱你心水～
薈萃日本三大和牛 壽喜燒．中川
由資深日籍主廚板垣和幸先生主理，主打三款達A5等級嘅極品和牛。包括油花最豐富、入口即溶嘅松阪牛、肉質細緻柔滑嘅大分和牛，以及口感清爽柔軟之餘，帶點嚼勁嘅北海道褐毛和牛。一共供應三款午市同四款晚市壽喜燒菜單，套餐內所有食材都誠意十足，如選用兵庫縣產嘅「日本一こだわり卵」作蛋汁，以及北海道米種中最上等嘅夢美人米以突顯肉香。
關東風和牛壽喜燒放題店 NIKUSA肉佐
放題都有高質和牛食！呢間關東風和牛壽喜燒．涮涮鍋．壽司刺身放題專門店，可以食到傳統嘅關東風壽喜燒，更可以無限任食宮城縣產仙台A5霜降黑毛和牛。呢款和牛肉質嫩滑，脂肪含量豐富且分佈均勻，肉質鮮嫩多汁，配上米芝蓮星廚長本輝彥先生嘅秘製招牌壽喜燒醬汁，啱晒牛魔王！放題更包括多款高質壽司刺身，食物款式多達110款，好吸引呀～
嚴選北海道十勝黑毛和牛 壽喜・關西
平食關西壽喜燒套餐～呢間餐廳提供6款唔同部位、分量嘅壽喜燒套餐，$168起就有交易，當中包括A4+赤身和牛片、極上肉眼等選擇，而且選用肉質香甜、油脂豐富嘅十勝黑毛和牛，入口更加滋味！套餐配有前菜、蘭王蛋、主食（白飯/烏冬）同甜品，性價比幾高。另外更特別用零下-30度冰櫃冷藏啤酒杯，帶嚟「冰鎮啤酒」配熱辣辣壽喜燒嘅衝擊滋味。
日廚坐鎮席前壽喜燒 壽喜燒 樹
圖：同樣主打關西風嘅席前壽喜燒，裝潢以黑色為主調，12席嘅L形吧枱都可以欣賞到師傅手藝。師傅選用高級和牛入饌，分別有重頭戲京都姫牛同熊本「和王」，牛味濃郁口感嫩滑，全部牛肉都由主廚親自人手切割，避免破壞和牛嘅纖維，以確保和牛質素。壽喜燒套餐包咗和牛海膽壽司、茶碗蒸、季節料理等，好啱撐枱腳或慶祝重要日子。
文：Yanica
編：Cathy
