疫巿難做，無奈結業同暫時停業嘅餐廳愈嚟愈多，不過同時都有唔少新店上場，為靜寂嘅餐飲業帶嚟生氣。好似旺角咁，近呢3個月都有成50間新餐廳開業，其中以下呢4間，有嚟自日本同台灣嘅過江龍、創新嘅中式糖水，亦有以外賣為主嘅鐵板燒。
外賣鐵板燒 一休鐵板燒
圖：hkgirl_hkfood、BeerPig.Foodie
平民價鐵板燒都算，仲要有得外賣，真係少之又少。行過可以隔住玻璃望師傅炒麵煎嘢食，食慾當堂大增。全部都係即叫即整，好多人都會試鵝肝鐵板燒，抵吖嘛，$68就有大大件鵝肝喎，配埋厚多士，脆邊香口。另外有鐵板炒麵，可揀拉麵、烏冬或意粉，再揀要豬雞羊是但一款肉，揀埋醬汁就可以等食，叫做止一止鐵板燒癮。
台灣過江龍 阿杏飯團 
圖：台灣開過嚟嘅創意飯團店，首間分店喺尖沙咀，1月開埋嚟旺角，預告嚟緊仲會進駐港島，疫巿下擴張得幾快。餐廳以外賣為主，門口有張透明吊椅再加櫻花樹背景，絕對係打卡位（不過阿嬋就唔好坐落去喇 XD）。呢度嘅飯團有好多款，例如會有鹹蛋黃同麻辣系列，仲會有紫糯米製作。推介可試招牌新宿燒汁牛扒飯團同，麻辣烤腸飯團，餡料十足，前者層次豐富兼有肉汁，後者辣辣地好惹味。
創新中式糖水 甜水
圖：新開嘅中式糖水舖，綠白色配搭嘅招牌重懷舊感。糖水既有經典款式，亦有新式啲嘅芋圓同養顏嘅桃膠系列等，但講到必試，一定係舖頭自家創作嘅金銀燉鮮奶。幼滑奶香嘅燉奶，仲有隻流心蛋喺中間，蛋汁流出甜身嘅燉奶多咗陣蛋黃香。滋潤嘅木瓜雪月糖水再落埋桃膠，美顏功效再多咗，而且又唔會話好甜，絕對係女生們嘅寵兒。
燕三条系拉麵 丸目背脂煮干 香港店
圖：嚟自東京嘅拉麵店，前排悄悄登陸。香港嘅拉麵店多以豚骨湯底為主，偶有雞白湯或魚介湯，但以豬背脂油為主題嘅真係少之又少。作為香港少數嘅燕三条系拉麵，湯底加入大量豬背脂同沙丁魚乾熬製，有助保持拉麵嘅溫度。麵條嘅軟硬度同脂肪數量都有得揀，最勁可以揀5倍脂！背脂粒粒愈多，層次愈豐富呢。而家仲加推埋日本總店名物——海老辛醬背脂煮干拉麵同海老辛醬背脂煮干沾麵，秘製辛醬加入咗大量日本產蝦頭炒製，蝦鮮味濃。
文：Kar