貴為銅鑼灣後花園嘅大坑，既有其美食集中地嘅優點，更加有銅鑼灣冇嘅一片清幽寧靜，難怪可以成為近年各位大大搵食嘅新寵兒。最近又有一間日本割烹料理餐廳進駐，由擁有逾25年餐飲經驗嘅葉師傅擔任行政總廚，提供多款配搭新穎又富有驚喜嘅菜式。

首推一定係海膽配龍蝦湯啫喱 ！單係叫個名出嚟已經贏在起跑線，聽埋師傅解釋製作過程就更加冇得輸。海膽唔多介紹啦，大眾飛佛，用靚貨味道自然甘香。要特別介紹嘅係龍蝦湯啫喱。師傅以龍蝦直接熬煮成精華嘅湯，再加入寒天使之凝固，口感軟滑彈牙得嚟又帶有陣陣龍蝦嘅鮮甜濃香，再加埋蛋黃醬同飛魚子，細細杯但食材豐富，層次感高。建議大家千祈唔好心急，一大啖海膽放入口，唔係就會搶晒其他食材嘅fo的啦。分開幾啖慢慢食啦~~

日本常見嘅甜食最中餅，師傅則將之混入以葡萄牙白砵酒加白蘭地醃製，再經低溫烤焗嘅鵝肝，同埋cream cheese喺入面變成鹹食「鵝肝芝士最中餅」，餅皮鬆脆，內餡濃郁膻香，一啖食晒啲油香會喺口中強力爆發。

割烹料理嘅精髓就係可以坐喺吧枱中，邊食邊睇住師傅烹製食物。所以坐喺吧枱嘅食客就有福了，面前有部烤爐，望住師傅製作一串串嘅串燒，香氣撲鼻，大大增加食慾。最有視覺效果嘅非瞬間薰製日本雞頸肉莫屬啦，燒完之後立就由煙熏槍注入櫻花木香，放喺密封瓶內上桌。一打開瓶蓋，先有仙氣，後有煙熏香味，雞頸肉入口滿滿油香，仲有肉汁，以黑七味粉調味亦令肉香更突出。

手羽先，即係雞翼亦係招牌菜之一，仲要係無骨雞翼嚟。除咗啱晒懶人之外，亦令食客可以專心感受脆香嘅雞翼皮同嫩滑嘅雞肉。

牛肉同豬肉嘅選擇都有，無論係澳洲和牛腹膜肉配芝士蛋黃醬，定係黑豚腩卷配山椒粉，兩者肉質軟腍，都係非常juicy。

如果怕淨係食肉串會唔夠飽，點都要有啲飯到肚嘅朋友仔，可以叫返碗特製壽喜燒風夏松露牛丼。牛肩肉經壽喜燒湯煮過，滲有甜香，再加埋隻鮮橙色嘅日本雞蛋，拮穿後沾上蛋汁，仲有松露增香，係有種滿足感嘅。

KONA
地址：大坑蓮花宮西街16號地舖

文、相、片：Kar