疏乎厘pancake可以話係近年港人最愛嘅甜品之一，食極都未厭。而呢間由日本過嚟銅鑼灣開店嘅pancake店，唔經唔覺原來都開咗成年啦。嚟緊佢哋即將會推出一周年限定嘅款式——宇治抹茶pancake呀！本身淨係得日本京都店有得食㗎咋，今次係香港第一次登場！

呢個宇治抹茶pancake抹茶控實大愛，連個pancake都有落到抹茶粉去整㗎，所以食落除咗有蛋香味之外，都仲會有啲抹茶味，鬆軟而且空氣感重。面頭嘅抹茶忌廉亦相當甘濃同軟滑，另外有自家製嘅大福同軟心朱古力伴碟，大福外皮煙韌，包住抹茶蓉同士多啤梨，好香甜。仲仲仲有杯抹茶雪糕仔添，記得要快食咗佢先呀。細細聲話你哋聽，7月28開始有得食，每日限量40份。

而家正值白桃當造嘅季節，加上今年白桃收成唔錯，曾經出咗一段短時間嘅白桃pancake又返返嚟啦。啲白桃係由日本山梨縣直送嘅，大大個，多多汁，啲果肉仲帶有少少粉紅色添呀，好鬼甜！如果食呢個白桃pancake嘅朋友，建議一啖pancake醮埋乳酪忌廉再連埋一嚿桃肉一齊食，滿足感會出晒嚟。而且仲會食到啲cream唔係普通嘅cream，而係帶有香甜桃汁味呀！同樣都係每日限量40份，想食就趁早。

夏天都好難唔飲凍嘢，沙冰就夠晒爽。新出嘅沙冰有成6種口味，包括朱古力咖啡冰、宇治抹茶冰、曲奇咖啡冰等等，Latte亦有三款新口味，包括鮮奶宇治抹茶、薄荷鮮奶咖啡同雲呢嗱鮮奶咖啡。

FLIPPER'S
地址：銅鑼灣軒尼斯道500號希慎廣場6樓i.t blue block

文、相：Kar