石燒牛扒店可以話係呢半年最紅嘅美食之一，專門店開完一間又一間，大角咀都有間啊，都幾抵食，最平$87就食到300g牛扒！附近嘅打工仔有時如果想對自己好啲，lunch食豐富啲可以留意下。

餐廳以快餐形式提供石燒牛扒，如果想快，揀立食區仲可以優先點餐同開餐添。Menu方面，呢間餐廳選擇就唔算好多，一眼望晒，最平嘅係加拿大肉眼，另外有阿根廷牛柳同美國安格斯西冷牛扒三款選擇，揀啱食邊款，師傅就會即場切肉、磅重，然後略略燒至三成熟左右（當然你可以要求再要熟啲或生啲嘅，但溫提塊熱石板有一定熱力好快燒熟，所以唔建議大家一開頭已經叫得太熟），就會放上熱石板，嗶上配料就可以開餐啦~

最平嘅加拿大肉眼位，塊扒仲大過塊板啊！肉質嫩滑，帶油脂香，邊邊位仲會有微脆感覺。

阿根廷牛柳嘅肉質則係三款牛扒中最軟腍嘅。

而講到肉味最濃郁嘅話，就一定係美國安格斯西冷牛扒喇，油分分佈仲好平均下，肉汁好香。唔可以漏咗嘅係佢哋嘅自家製柚子燒汁，酸酸甜甜，同牛肉好夾，而且仲會令牛肉多咗份甜味。

叫個set就會有飯/湯/沙律/嘢飲（四選三），嘢飲唔係淨得汽水或茶㗎，食牛喎，鋸扒喎，梗係有酒先開心。細細支紅酒又得，好似啜啜啫喱咁嘅微汽泡蒟蒻清酒都得，後者口感幾得意，仲有蘋果、桃同梅子三種口味，甜得嚟又有少少酸苦度，幾清爽，好啱女生飲！

牛扒 ミディアムレア ステーキ
地址：大角咀博文街11號富貴大廈西座地下17號舖

文、相、片：Kar