九龍區新Cafe越開越多，包括大角咀呢間綠白色門面嘅日系Cafe，大玻璃窗加上簡約裝修感覺舒適之外，食物同飲品都非常用心。飯糰選用日本越光米配搭唔同食材，House Blend咖啡會按季節更換，季節茶用AeroPress手沖，每泡都有唔同風味！
 

定食套餐（$78）

浮生位於旺角同大角咀中間，頗有旺中帶靜嘅感覺。食物以日式輕食為主，定食套餐包括自選飯糰、鹽飯糰、主食同兩款自選配菜。店主試過唔同產地唔同品種嘅米，最後揀咗用日本新潟越光米，味道香甜、飯粒黏糯而有彈性。鹽飯糰就以日本海鹽帶出米香原味，另一款開飯仔就揀咗七味吞拿，吞拿魚餡加入希臘乳酪，味道清爽，表面嘅七味粉係點綴，亦增加味道層次。
 

主食有關東煮、豚肉角煮同照燒雞肉選擇，關東煮嘅湯底亦係自家熬製，放入配料浸過夜確保入味，麻糬魚腐外韌內軟，獅子狗口感彈牙，蘿蔔入味無渣。配菜推介柚子蓮藕，柚子清香突出，蓮藕片非常爽脆。
 

五目雞肉飯糰（$22/單點）

飯糰以可以單點，五目雞肉嘅五目係指五款食材：紅蘿蔔、牛蒡、冬菇、木耳、雞肉，配搭健康同時味道豐富。另一推介係梅·十六飯糰，係夏季限定口味，選用十六穀米，特別有咬口。
 

和風豆乳雜菌烏冬（$68）

餐廳亦有供應麵食，呢款係全素選擇，醬汁以豆乳為主，以豉油、味醂調味，甜中帶鹹。讚岐烏冬彈牙之餘亦夠掛汁，加上雜菌嘅香氣，女仔一個人食一份都唔會太膩。
 

留白（$40）

即係Dirty，上面係熱濃縮咖啡下面係凍牛奶，可以同時飲到熱同凍兩種層次。House Blend咖啡會按季節替換，夏季嘅House Blend係請台灣咖啡師炒豆，糅合六種唔同咖啡豆，入口先有類似熱帶水果嘅微酸，加埋牛奶飲到少少甜味，Aftertaste係可可嘅香味。
 

精選季節茶：桂花龍井（$56/手沖）

用AeroPress沖咖啡已經唔算常見，沖茶就更有新鮮感！原來因為方便控制水溫同浸泡時間，所以揀用AeroPress沖泡，沖過嘅茶餅之後亦可以回沖，而且每泡都有唔同嘅風味。例如呢壺桂花龍井，第一泡桂花香明顯，回沖後第二泡花香同茶香會更平衡，第三泡就更有茶感，亦更帶回甘。
 

 

黑芝麻芝士蛋糕（$45）

甜品暫時有三款芝士蛋糕，黑芝麻口味嘅黑白雙色夠搶鏡，選用京都產黑芝麻，蛋糕帶淡淡芝麻香，點埋黑色嘅芝醬香氣更為濃郁。口感Creamy，甜度適中。
 

柚子芝士蛋糕（$45）

採用日本高知縣柚子製作，蛋糕面以碎柚子皮點綴，味道微酸帶柚子清新香氣。而旁邊嘅柚子醬偏甜，可以按自己喜好配搭蛋糕一齊享用。
 

焙茶芝士蛋糕（$45）

最受歡迎嘅焙茶芝士蛋糕，食得出焙茶香味不過唔算非常濃郁，反而仲食到芝士蛋糕本身嘅少少酸味。口感比另外兩款口味結實。
 

浮生
地址：大角咀晏架街8號地舖

文：Cathy
相、片：Calvin Kwok