去中環飲嘢唔係去老蘭吓嘛？最潮梗係去大館！入面唔止有餐廳，有幾間酒吧可以happy hour，最新呢間Dragonfly，由大師Ashley Sutton設計，每間都好有個人風格。要走一小段路先至去到，都幾神秘架。

如果你有密集恐懼或昆蟲恐懼症，真係唔入得！一貫佢招牌設計，Iron Fairies係蝴蝶、J. Boroski係甲蟲，Dragonfly顧名思義就係以蜻蜓做主題。酒吧後巨型人型蜻蜓，創作靈感來自法國藝術家René Lalique設計的胸針，都幾詭秘。

酒吧以19世紀末嘅歐洲新藝術（Art Nouveau）時代風格設計，天花第一眼以為係青綠色嘅眼球，睇真啲係蜻蜓松石玻璃燈，牆身、枱面都有500隻鑄鐵製成蜻蜓裝飾。

雞尾酒由調酒師Brent主理，以藝術家而命名，取材自世界各地。好似珍珠奶茶雞尾酒Dragon’s Pearl ($120)明顯來自台灣，奶茶用茉莉花茶沖成，花香濃郁而且輕盈少甜，配上黑加崙子酒、氈酒及干邑，但酒味唔強，配上粒粒珍珠易入口。

另一款Monet’s Teapot ($208)則似日式綠茶！以氈酒、清酒、青蘋果酒混合青瓜汁及紫菜雪葩，倒入日式鑄鐵茶壺內，加埋乾冰似煲滾嘅綠茶。飲落酸酸哋好清新，一壺可以供兩人飲用。

鍾意Bloody Mary嘅，應該要試試變奏版Madam Marie ($140)，辣根浸過的伏特加，加埋蕃茄蜆汁、喼汁、檸檬及煙燻鹽，放上自家醃漬甘筍及愛爾蘭生蠔，飲落鹹鮮味好突出，亦更有層次。

其他招牌雞尾酒包括泰式口味嘅Golden Serpent、將Negroni變成酸味嘅Gaudi Sour、鹹味Martini等。其中一款低酒精度嘅Designated Driver，柯打會捐出$5去種樹，有意義。

配酒小食都幾豐富，以tapas、fingerfood類為主，牛肋骨刈包慢煮而成，配上海鮮醬、醃洋葱等有幾分似叉燒包。

Short Ribs Bun $158

牛油果豆蓉加紫色粟米片夠晒滑溜香口，而且素食者都啱食。配酒想食濃味啲，熱溶芝士配西班牙辣肉腸就好香口，而且食完芝士護胃，飲多兩杯都唔怕！

Avocado Hummus ($98), Melted Cheese with Spanish Chorizo ($118)

室內以高枱為主，想chill啲可以坐室外，喺紅磚監獄入面飲酒，都幾有氣氛架。

文、相、片：Perrins