又多一間朝啡晚酒主題cafe喇！呢間cafe位於近天后嘅小巷，白日主打西日fusion菜式，夜晚就主推日式串燒。負責人強調佢哋冇供應刺身，所以即使有串燒配日本清酒同生啤，都唔係居酒屋嚟㗎；而堅持做cafe形式係想畀人好chill嘅感覺，更加唔會設定用餐時限。

室外座位抬頭見到嘅牆畫，當中白色塗層熄燈後會有螢光效果。

店門前嘅室外座位係寵物友善空間，亦係其中一個打卡位，抬頭重會睇到由MC仁親自設計同手繪嘅牆畫。

牆上字句意思係「不忘初心」，同時提醒負責人記住餐廳嘅宗旨。

黑色牆身使用唔同物料令燈光更有層次感。

店內則設計成半邊白色配半邊黑色，時尚有格調，同時切合入夜轉換菜式主題嘅感覺。

三重芝士手做和牛肉漢堡配薯條（$138）

Burger手工即製，需時約15分鐘，入口濕潤juciy。

呢度嘅菜式都好足料，好似三重芝士手做和牛肉漢堡配薯條兩個女仔開心share都得。漢堡扒juicy厚肉，而自家製菇醬有大量大啡菇粒，加上巴馬臣芝士同車打芝士分別有片狀、融化質感同自製芝士脆片3種質地，令口感層次更豐富。配埋撈咗少少辣粉嘅炸薯條同沙律，惹味得嚟又有蔬菜平衡返。

泰蔭功海鮮日本湯烏冬（$88）

啖啖肉嘅海鮮好加分。

鍾意食烏冬嘅朋友，推介你試試泰蔭功海鮮日本湯烏冬，一碗齊集鮮味有肉地嘅越南虎蝦、紐西蘭青口同刺身級帶子。湯底酸爽香辣，帶有椰奶香氣而唔會好油膩，配彈牙嘅烏冬吸收湯汁都好夾。

Jasotto鰻魚蛋蓋芝士燴飯（$118）

餐廳更獨創Jasotto系列，即係用risotto煮法煮日本米，加上採用久保田其中一款單品新鮮米，嚟到香港先打殼以保留水分，使飯底口感煙煙韌韌。鰻魚蛋蓋芝士燴飯配上鰻魚串燒，等大家未到晚市都可以過下串燒癮。鰻魚皮香肉嫩，配芝士燴飯令鹹香味更豐富。

燒海鮮組合（$268）

銀鱈魚同甲羅燒佐酒一流。

晚市主打嘅串燒以自家製燒汁製作，而燒汁用日本食材整成，味道偏甜香。串燒有單點同套餐選擇，配日本清酒同生啤都好夾；生啤係日本Orion出品，口感幾清爽，女仔都啱飲。其中燒海鮮組合包含4款食材，更以唔同烹調方法製作，一次過畀你品嚐多種口味。建議大家由淡味食到濃味，先食燒虎蝦同白酒青口，再食燒西京銀鱈魚同味噌蟹膏甲羅燒。

鳥燒串燒組合（$138）包埋招牌免治雞肉棒。

鳥燒串燒組合則為肉食控而設，4款串燒由左起包括招牌免治雞肉棒、雞軟骨、雞腎同手羽燒，其中手羽燒提供日本汁燒同鹽燒兩款口味畀你揀。平時嘅免治雞肉棒多數配月見汁，負責人話咁樣可以令口感滑啲，但佢哋對自家製嘅免治雞肉棒好有信心，唔配月見汁都好juicy；加上自己調控軟骨粒粒嘅大細同比例，每啖都好有咬口。

草莓焦糖多士配意大利雪糕 （$78）

甜品口味大眾化，其中草莓焦糖多士配意大利雪糕嘅多士外脆內軟，更灑上糖霜，同雪糕一齊食香香甜甜好滋味。

 玫瑰Cappuccino（$42+5）

呢度嘅House Blend混合咗3款豆，酸度適中，入口滑身。想味道有多啲變化，可以試下加糖漿，有玫瑰、荔枝、焦糖、榛子同蜂蜜味；呢杯Cappuccino加入玫瑰味糖漿後就有淡淡嘅花香喇。

黑目

地址：銅鑼灣信德街18號地舖

文、相：Cathy.C