西灣河太安樓被譽為東區小士林，雖然未去到葵廣咁多新花款，食物較平實，最出名有雞蛋仔格仔餅、沙嗲串燒、車仔麵等港式小食，勝在平靚正，一到放學放工時間真係塞滿搵食人潮！最近行過太安樓發現有新嘢食，即刻去掃街先！

麻辣霸氣魚蛋    篤爺

太安樓有幾檔賣魚蛋，新開嘅篤爺就主攻超麻辣陳皮魚蛋，選用香港製造嘅新鮮陳皮魚蛋，細細粒較腍身，陳皮味好突出。自製麻辣汁加入大量花椒、辣椒、八角等香料，夠香夠麻，辣得過癮！唔想咁刺激可以揀咖喱魚蛋，另有魚肉及豬肉燒賣、牛丸等篤篤小食。

霸氣魚蛋 $7/7粒小食名改得好搞笑

即場包製小雲吞    小麵站

總店位於太子，招牌作為自家製小棠菜豬肉小雲吞，一口一件，一碗$20有成12隻，鮮甜雞湯可加辣，都幾飽肚！另外涼麵都係必吃，加入大量香料、辣椒及調味料等，汁料夠多，雞肉絲亦好滑，撈麵酸酸辣辣非常開胃，好適合夏天食！

小雲吞 $20/12隻、$29/20隻

雞絲涼麵 $25

$15泰北船麵    味雷

小店主打泰式韓式飯卷及泰式船麵，老闆曾遠赴泰北學製，以豬骨熬6、7個鐘嘅湯底帶濃郁香料味，冇加豬血，但仍然有濃稠質感，仲冇咁膩。金邊粉、米粉及豬肉丸均來自泰國，配上荷蘭豬腩肉，$15好抵食。飯卷亦有十幾款口味可選，即叫即製而且好足料。

船麵 $15（小）

泡菜豬肉飯卷 $28

爆焰紅豆餅    南國紅豆餅

早前都介紹過嘅紅豆餅，六款口味有紅豆、吉士、芋頭、紫薯、芝士鹹牛肉薯仔及芝士忌廉薯仔，餡料爆瀉，外皮用日本雞蛋製作，唔會過厚，而且密密製作，拎上手仲係暖身。招牌紅豆用台灣萬丹紅豆，食到粒粒口感，味道偏清淡，開飯仔就係鍾意佢唔甜，食得出原材料味道。

甜味 $12/件，鹹味 $15/件

香芋同樣食到粒粒芋頭

文、相、片：Perrins