西灣河太安樓又有新小食登場！南國紅豆餅位於太安樓外面街角，獨沽一味只賣六款口味嘅紅豆餅，紅豆餅亦即係車輪餅，日本就叫做大判燒。舖頭只做外賣，有玻璃窗可以直擊製作過程，好有日本小店feel！
店子負責人Michelle稱，因為自己鍾意食而創業，食勻香港、台灣及日本嘅紅豆餅，再研發出適合嘅味道。紅豆餅餡料特多，餡料大約有成60-70克，全部都係即日新鮮自家製。
自家調製蛋漿用上日本雞蛋，成本高但係蛋香更濃。餅皮偏薄身，外脆內軟，而且放耐咗都唔會硬崩崩。
招牌紅豆味($12)用上較清甜嘅台灣萬丹紅豆，要煮成3個鐘至腍身，唔會加入太多糖保持少甜，食落有起沙及粒粒口感。
芋頭、紫薯同吉士(各$12)都係少甜為主，一咬爆餡，味道帶天然香甜，熱辣辣出爐就最好味。
鹹食都有兩款，推介鹹牛肉芝士薯仔($15)，芝士呈流心狀態，而且鹹牛肉同薯仔好夾，食完都幾飽吓！
紅豆餅製作需時15-20分鐘，Michelle及店員密密手不停製作，每次整到40個左右，所以食時都仍然微暖。繁忙時間大約5pm後，最高峰時期日賣2,000個！
地址：西灣河筲箕灣道57-87號太安樓地舖
文、相、片：Perrins