疫情由年頭起一直到而家，都依然反覆不定，對社會、經濟產生嘅影響日益浮現。可幸嘅係，喺艱難嘅時間內仍然見到溫暖，其中一道暖光就係來自一直身為酒店業先軀嘅香港逸東酒店。

早喺政府禁全日堂食嘅日子，逸東酒店已經開放宴會廳畀有需要嘅人士入內用餐。不過受政府規例所限，現時開放時間只係會去到下晝3點。

而由今個星期六（8月8日）起，佢哋更加啟動「Pay It Forward美味共享」計劃，希望可以以新鮮即製嘅美食，幫助低收入家庭同有需要人士。酒店內嘅3間餐廳，包括花樣年華、Fûhn同靚湯廚房每日都會捐贈免費餐點，同時鼓勵各食客可以去購買待用餐，等待有需要嘅人士去到餐廳時可以免費領取。

好事唔怕講多，酒店一直有同「撲水」合作，免費提供飲用水，亦有同社企「絲打便當」合作，於近兩個月合共派發咗600份愛心包畀本地有需要家庭。

香港逸東酒店
地址：佐敦彌敦道380號

文：Kar