想食正宗娘惹菜，不如試試呢間開喺工廈嘅新加坡餐廳？餐廳老闆卓小姐係新加坡娘惹人，佢話因為平時喺香港好難食到啲接近家鄉味道菜式，自己又好鍾意煮野食，所以就開間店試試啦～店舖食物選擇就貴精不貴多，但常見嘅喇沙及肉骨茶都通通有得食！
娘惹招牌大蝦喇沙
講到娘惹菜又點少得喇沙，呢味招牌大蝦喇沙，湯底味道香濃，麵底係掺掺。湯底用炒好嘅材料再加蝦殼熬約三小時，最後加上椰奶。老闆就話正宗娘惹喇沙係偏辣，大部份香港人都接受唔到，所以辣度就稍為調較咗，主要偏向香辣嘅味道。
星色肉骨茶配飯
肉骨茶同樣都係新加坡名物！因為老闆爸爸係潮州人，所以呢度嘅肉骨茶就混合些少潮州風味，按佢哋家族特色加入豬肚，肉骨茶細火熬製，加入炒香白胡椒，有陣陣白胡椒香氣，而且香而不辣。
更多【新店直擊】： |
招牌藍豆花椰醬飯
椰漿飯加入蝶豆花天然色素、斑蘭葉及椰漿製成，有淡淡嘅椰香～配菜有蝦醬雞翼及雞肉串，雞肉串堅持使用雞髀肉，配埋沙嗲醬及參巴醬食就更惹味。
螃蟹海鮮肉球魚肚湯
至於呢道螃蟹海鮮肉球魚肚湯喺香港就真係難啲搵到啦。將手打海鮮膠、蟹肉及肉碎搓成球狀，質感彈牙，而湯就用魚肚及雞等熬三小時，味道都幾鮮。
不過要留意返，餐廳只於星期一至五11:00-17:00及星期六11:00-16:00營業，記得留意返開門時間以免摸門釘！
地址: 葵芳大連排道162-170號金龍工業中心2期2樓G室
文: Yanica
相、片: Tom Li