母親節最梗要一家人齊齊整整食餐飯，雖然係老套啲，不過相信呢個都係唔少媽媽們嘅諗法。好多媽媽都鐘意食brunch，貪佢可以慢慢食慢慢嘆。今年嘅母親節brunch除咗菜式多元化之外，有啲餐廳仲有媽媽尊享優惠添。咁就唔怕媽媽肉赤，可以盡情enjoy！
日式悠閒brunch 千鶴日本料理
如果你媽媽鍾意日本嘢嘅話，咁就要帶佢嚟試下呢個日式brunch啦。任食刺身同壽司就一定唔少得，刺身有三文魚、金槍魚同甘海老等8款，總有一款啱你媽媽心水。而主菜就有即叫即煎嘅鐵板美國安格斯牛扒，肉味濃郁，夠哂惹味。而小朋友就可以揀兒童便當，有三文魚壽司、吉列蟹肉忌廉薯餅同免治雞肉串等，小朋友應該會好鍾意。
供應日期：5月12及13日
供應時間：上午11時30分至下午3時
價錢：成人$488（可加$98享無限添飲之汽泡酒及清酒）；10歲以下小童$180（兒童便當）
*凡於酒店網站預訂可享可享高達85折優惠，詳情請按此。
室內花園brunch GREEN
呢間餐廳以室內花園為主題，有植物裝飾同落地玻璃，感覺好舒適。而佢哋嘅母親節早午餐主菜就有香煎鱸魚同炭燒雜扒(牛柳丶羊扒和厚切煙肉)等，而甜品就有由糕餅總廚何維城師傅(Danny Ho)設計嘅甜點，好似選用日本草莓入饌嘅鮮果蛋糕同朱古力紙杯蛋糕等，喺呢個環境下嘆brunch夠哂chill。
供應日期：5月12日
供應時間：上午11時45分至下午2時15分
價錢：成人$368（可加$98享限量供應 Prosecco 氣泡酒及紅白酒）；3-11歲小童$188
四人同行媽媽半價 OM Tapas
呢間餐廳就主打四人同行媽媽半價，只要一家四口嚟享用限時兩小時嘅brunch，媽媽就可以半價享用平時需要$298一位嘅brunch啦！而食物就以西班牙菜為主，好似有黑松露火腿三文治、西班牙海鮮飯同西班牙炸油條等，造型精美小巧，每樣試少少都無問題。
供應日期：5月13日
供應時間：上午11時30分至下午5時30分（其中兩小時）
價錢：$298/位（四人同行媽媽半價）
法式精美甜點 City Café
多數媽媽都應該鐘意食甜品嘅，呢間酒店嘅母親節自助午餐就特別提供一系列睇得又食得嘅法式甜點，有玫瑰花同紅唇等造型，實在忍唔住講返句：「好靚呀！」而其他菜式仲有燒美國肉眼、燒羊腿配薄荷燒汁、同泰式糯米釀雞翼等。
供應日期：5月5至6日及12至13日
供應時間：中午12時至下午3時正
價錢：成人$278；65歲或以上長者$258；4-11歲小童$208
*於酒店網站預訂可享優惠價成人$258；長者$228；小童$188，詳情請按此。
意大利風味 Gia Trattoria Italiana
呢間就啱哂鐘意食意大利菜嘅媽媽啦。前菜同甜品都可以揀buffet，有各式凍肉、芝士同水果撻等，種類好豐富。而主菜就可以揀一樣，其中烤豬扒配燉雜菜、自家製墨汁意大利粉配大蜆、帶子及白酒汁同蠶豆綿羊奶芝士意大利飯等菜式都係母親節限定。想豪啲仲可以加$168任飲PERONI 生啤、意大利氣酒同紅白酒添！
供應日期：星期六、日及公眾假期
價錢：＄388/位；另加$168可任飲PERONI 生啤、意大利氣酒同紅白酒兩小時
母親免費享用 Jinjuu
母親節又要請食飯又要買禮物，都要使唔少錢。不過呢個韓式brunch就夠哂抵食，凡三人以上共進早午餐，母親就可以免費享用啦！小食好似沙嗲串燒、吞拿魚他他同蕎麥麵等都係任食嘅，仲放喺個好靚嘅架上面添，啱哂「相機食先」。
供應日期：5月13日
價錢：＄388/位
文：Crystal