無論係同屋企人慶祝生日，同親朋戚友食飯，或者招待國外朋友想食中菜，片皮鴨（北京填鴨）都係其中一個好選擇。開飯仔幫大家搜羅咗以下七間城中推介，有平有貴，有京式片連肉有新派一鴨三切。提提大家片皮鴨始終都係工夫菜，唔想撲空建議先Book枱預約定！
Fine Dining價（人均$401 - 800）
豪華中菜館三切 卅二公館
42天飼養北京片皮鴨（蘋果木燒）需要早一日預訂，先上枱比食客見過真身，再切成鴨皮、鴨皮連肉同鴨肉。鴨皮點黃糖即食油脂入口即溶，鴨皮連肉就可以配青瓜京蔥同海鮮醬再用荷葉餅包裹進食，鴨肉可以點醬食，亦可以加錢做香爆鴨件或鴨鬆醬油炒飯。
豪少少價（人均$201 - 400）
新派填鴨之選 沙田18
Budget想低啲又想食到一鴨三切嘅話，沙田呢間酒店餐廳就絕對係另一個好推介。烤鴨三食先有片皮鴨，廚師會喺食客面前即場切鴨，先切鴨皮點糖食，然後係鴨肉，最後鴨脾部位係切成皮連肉。而二食係香口嘅鴨鬆生菜包，三食係鴨湯。順帶一提佢地嘅雪糕非常有特色，可以留肚一試！
傳統新派糅合十食 大都烤鴨
圖：紫揚晴海
尖沙咀呢間中菜館既保留掛爐配以果木薰烤嘅方式，同時喺鴨架菜式上面加以創新。片皮鴨分鴨皮同鴨肉，鴨皮已經去除皮下脂肪，食落脆卜卜而唔油膩。配料有紫蘿蔔、蜜瓜、青瓜、京蔥、京醬、砂糖同荷葉餅。鴨架則有荷香包鴨飯、梅子炆鴨架等十款選擇。
更多【開飯專題】： |
親民價（人均 $101 - 200）
堂弄京式片皮鴨 金滿庭京川滬菜館
圖：不孤獨的美食家
呢間連鎖京川滬菜館唔單止定價較為親民，而且仲會由廚師喺你面前將原隻烤鴨切片，以皮帶肉為主，值得一讃嘅係師傅動作夠快，鴨片食落夠熱。配料有北京人點開嘅蒜泥同大葱、青瓜、甜麵醬、餅皮。可以改為二食，從生菜鴨鬆、津白豆腐鴨骨湯同醬爆鴨骨任擇其一。
皮脆肉嫩招牌菜 玉桃軒酒家
之前開飯仔喺生日飯局中菜篇就介紹過觀塘呢間中菜館，一樣有店員堂切烤鴨，一樣係皮連肉嘅切法，皮脆肉嫩。用餅皮包住鴨片同甜麵醬、青瓜同大葱一齊食就最啱。而改為二食嘅話選擇有鴨鬆生菜包、涼瓜炆鴨件、薑蔥炆鴨件同豆腐菜苗滾鴨湯。
抵食價（人均 $51 - 100）
高CP值小館 老掌櫃東北菜館
圖：l.tsui
大角咀呢間餐廳嘅木枱木凳坐得無一般酒樓咁舒服，但勝在古色古香幾有特色。片皮鴨係皮帶肉，配青瓜、京葱同餅皮。鴨片食落皮脆有油香而鴨肉亦唔會太乾太柴，及格有餘。唯一要挑剔嘅係加配料需要加錢，不過望返片皮鴨個單價，計翻CP值點都係抵嘅。
水準京川滬菜 霸王山莊
呢間喺尖沙咀同大角咀都有分店，唔少人會去試點心，其實片皮鴨水準亦唔錯。佢地嘅片皮鴨嘅特色係比較少脂肪，好處係皮連肉食落都唔太油膩，壞處係可能會覺得香味唔夠。配青瓜、京葱同餅皮。
文：Cathy
