蜂蜜水潤喉養肺，但蜂蜜唔係得開水飲咁單調。最近喺將軍澳新開、亞洲首間以蜂蜜為題嘅茶飲店，同擁有72年歷史嘅日本第一養蜂企業「杉養蜂園」合作，用佢哋高質嘅蜂蜜同多款生津果汁蜜，創作一系列健康茶飲同輕食。

店內同時兼賣杉養蜂園嘅蜂蜜同果汁蜜

杉養蜂園喺1946年開業，於日本九州熊本縣起家。佢哋主張健康養蜂，亦堅持唔用任何化學藥品，所以用佢哋招牌嘅麥盧卡蜂蜜同多款果汁蜜製作飲品，會比一般茶飲健康。

特色蜂蜜飲品推介

麥盧卡蜂蜜香蕉沙冰（$52/凍）

夏末重係熱熱哋，飲杯沙冰解渴都唔錯。麥盧卡蜂蜜香蕉沙冰將天然嘅麥盧卡蜂蜜，連同新鮮香蕉、牛奶打成沙冰，再外加新鮮香蕉片同蜂蜜，透心涼得嚟好清潤。

蜂蜜抹茶鮮奶（$36/冷熱同價）

抹茶控必試呢杯蜂蜜抹茶鮮奶，用日本抹茶粉製作，茶底甘香滑身，加入蜂蜜更增添一份微微嘅清甜味。

果汁蜜特飲

巨峰蜜青檸薄荷梳打（$36/只供凍飲）

呢度重有多款清涼無酒精雞尾酒，漸層顏色好靚𠻹。先將薄荷葉同青檸壓出汁液，再加入巨峰蜜同梳打水，就整成呢杯清爽嘅巨峰蜜青檸薄荷梳打喇。

紅桑子蜜青森蘋果梳打（$42/只供凍飲）

加入紅桑子蜜嘅紅桑子蜜青森蘋果梳打，甜中帶酸幾啱女仔口味。食埋幾片新鮮嘅日本青森蘋果，可以中和酸度又健康啲。

自選芒果杉蜜梳打（$28/只供凍飲），如果配水冷熱同價（$25）。

你亦可以自由組合個人口味！7款精選果汁蜜包括柚子杉蜜、紅桑子杉蜜、巨峰杉蜜、芒果杉蜜、蘋果杉蜜、藍莓杉蜜同檸檬杉蜜都可以配梳打水或水；想味道多啲變化或增加咬口，可以額外追加鮮檸汁（加$4）、鮮青檸汁（加$4）同蜂蜜蒟蒻（加$6）。而7款果汁蜜中，芒果杉蜜嘅果香突出，酸甜度都幾適中。

甜品輕食

牛乳蜂蜜軟雪糕（$28，加$20配蜂巢）

甜品方面，牛乳蜂蜜軟雪糕係用日本牛奶同蜂蜜自家製作，奶香味濃，質地凝實。舖頭重會不定期由日本直運原板蜂箱到港，畀你升級配原塊蜂巢，食到最天然健康嘅味道。

蜂蜜窩夫（$16）

外脆內軟嘅蜂蜜窩夫即叫即製，可以自選配蜂蜜或果汁蜜。

BUZZ STAND
地址：將軍澳唐賢街9號PopCorn商場二期一樓F87號舖

文、相：Cathy.C、餐廳提供