嘆鮑魚同白酒都唔一定好貴嘅，尖沙咀新開嘅一間南非鮑魚主題餐廳，除咗有一系列慢煮鮑魚、龍蝦、燕窩輕食之外，仲即將推出任飲白酒配鮑魚套餐！

門口位置放咗幾盒畢卡索、梵高等嘅名畫木盒，行過唔知仲以為係間藝術擺設舖，殊不知原來係賣鮑魚輕食嘅。除咗堂食，亦可以買走即食鮑魚禮盒，有南非養殖鮑魚、南非野生鮑魚、紐西蘭野生黑金剛鮑魚3款揀。

至於餐廳所有菜式均由瑞士米芝蓮一星名廚Jean-MarcSoldati設計，食材矜貴，用料講究。舖頭採用嘅南非鮮鮑魚，以純天然方式養殖，用天然海藻餵飼，經清洗後原隻放入真空慢煮袋，低溫長時間烹調，保留原汁原味。隻隻入口軟腍，帶有鮮味。

原隻南非慢煮鮑魚配沙律擺碟精緻，新鮮蘆筍、車厘茄等各種蔬果感覺清新，更能突出鮑魚嘅鮮味，最得意係一粒粒淡黃色珠珠，好似爆爆珠咁咬開會爆汁，原來係西班牙松露橄欖油嚟，用嚟吊鮮又幾ok。

食得健康都唔等於要食得清淡嘅。呢兜骨膠原就盛滿鮑魚精華，加埋熬製8個鐘嘅澳洲龍蝦湯汁凝凍而成，鮮味濃郁，仲可以養顏添。

以瑞士米芝蓮名廚秘製醬汁煮成嘅南非慢煮鮑魚配天使麵，帶有微微鹹香，連埋香脆蒜粉，口感又幾豐富，仲有些微辣香添。

以法式千層酥為露感嘅鮑魚龍蝦千層，以麵包夾住龍蝦肉同鮑魚粒，望落好豐富。不過雖然搽咗層蜜糖芥末醬喺中間，但味道依然略為清淡，而且鮑魚切成粒後鮮味亦有減少。

就連甜品都唔嘢少㗎，意式雪糕上除咗插滿自家製曲奇同水果外，仲有2克燕窩啊！入口爽滑，配埋微酸嘅紅桑子骨膠原雪葩都幾夾。

另有多款以鮮果製作嘅cocktails同mocktails，特別推介芒果威士忌，飲落先係香甜嘅芒果、菠蘿味，慢慢再滲出威士忌香，面頭仲放滿士多啤梨、黑紅莓、橙等，又靚仔又易入口，應該會深得女生歡心。

講定個預告大家知，餐廳即將推出happy hour任飲套餐，平日下晝5點，$300唔使就可以喺度嘆返隻鮑魚，兼且無限任飲汽泡白酒2粒鐘啊！

尚鮑
地址：尖沙咀梳士巴利道18號Victoria Dockside K11 Musea B2樓B201-18號舖

文、相、片：Kar