酒店自助餐不時換主題先至吸引到回頭客，尖東千禧新世界酒店嘅Café East之前先裝修重開，好快已經換咗新主題。今次牛迷盛宴自助晚餐，一睇就知以牛肉為主打，另外仲增咗唔少新食品，即睇有咩回本菜先！
鍾意食牛肉嘅朋友，首先要食一定係澳洲風乾和牛！一般風乾火腿好少用到和牛級數，呢一種係澳洲和牛製成，有唔同部位好似係腩位、salami、pastrami等，油脂豐富，比起豬肉火腿肉香更加濃郁。
意式牛肉薄切用上牛冧肉，配上橙味橄欖油及少許芝士，質感軟滑。
鐵板燒和牛扒每次柯打都有一整塊，即叫即燒，燒至medium rare，入面仲有少少生就最好食。
Carving燒肉枱就有烤美國連骨肉眼，成條肋骨即叫即切，都幾大塊，可配上自家製燒汁。
連中式燉湯都係牛肉熬製，螺頭松茸燉牛腱湯味道清甜足料，火候十足。其他牛肉菜式仲有日式醬油牛肉手卷、泰式牛肉沙律、特式燴牛肉等，牛迷實滿足！
甜品都有新款式！最吸睛係呢一系列點心造型嘅甜品，有蝦餃、鵪鶉蛋燒蛋、炆鮑魚同灌湯餃，一籠一粒，神似又可愛。全部都係唔同口味嘅大菜糕製成，白色係椰子、黃色係芒果、啡色就係咖啡。
最搞笑係點心紙都食得落肚，用食用打印機print出嚟，細緻到連大中小特點同埋經手人都有！不過食落其實冇味，勝在過癮。
每晚都有新鮮出爐嘅即製甜品，未出爐已經聞到陣陣烘焙香甜氣味，熱情果梳乎厘的骰輕盈，甜度啱啱好。
更多飲食潮流： |
其他回本必吃當然有一系列凍海鮮、葡式燒乳豬、Häagen-Dazs雪糕等等。呢個主題會做到三月尾，牛迷要趁早去食喇。
供應時間：6:30pm-9:30pm （供應至三月尾）
價錢：星期一至四成人$538、小童$268；星期五至日及公眾假期成人$598、小童$318
文、相、片：Perrins