鍾意閒時飲返兩杯嘅朋友仔注意喇，尖沙咀一商場有個日本啤酒園pop up呀。除咗有原味同黑啤之外，仲有3款新出嘅夏日果味同埋有透心涼嘅frozen beer。同埋唔使驚話會空肚飲啤酒，因為現場仲有多款佐酒小食添~

三款新果味嘅麒麟啤分別有奇異果、血橙同菠蘿味，三款果味各有特色，奇異果味酸酸地，血橙味就澀澀地，菠蘿味就甜甜地，但就同樣都係以第一道麥汁所釀製嘅一番搾啤酒做基底，所以飲落幾清香幾fresh嘅。貪心酒鬼唔使諗，一set五款combo就可以咩味到試晒。

而想再冰涼啲再夏日氣息重啲，就揀frozen beer啦。On tap嘅啤酒即叫即斟，再唧多層零下5度嘅啤酒泡沫，係爽歪歪嘅。

逢星期六、日，現場仲有自動逆轉生啤機，酒鬼可以畀$65買呢隻杯，咁就有得自己斟啤酒，不過就只限原味啦，同埋每日限量350杯。

至於小食方面，首推北海道三文魚乾，係幾有咬口，而且都食得到陣陣三文魚香呀，配埋酸酸地嘅奇異果味啤酒都幾夾。

而日式燒汁雞軟骨同鹹鹹香香嘅風乾蠔肉，配襯黑啤都唔錯。

想要刺激感，食日式七味粟米片嗰陣，記得一啖擺多幾片，食下食下都的確會有啲辣辣地呀，呢個moment飲返啖啤酒就爽晒。

甜品都有，啤酒雜莓啫喱。用啤酒加橙味藍橋酒製嘅，食落有淡淡嘅蔗糖香同酒香。

最後要介紹嘅一款係啤酒爆爆珠，口感係幾特別嘅，面層係膠膠地咁嘅薄膜，成粒放晒入口一咬，就會爆開然後爆「汁」，略略有啲啤酒味嘅。

詳情
KIRIN ICHIBAN GARDEN 2017
日期：即日 至 9月3日
地點：尖沙咀Mira Place中庭

文、相：Kar