對牛魔王嚟講，食到一塊肉汁豐富肉味香濃嘅牛肉，可以話係一大滿足，如果再加埋杯啤酒，就真係chill享受。話說尖沙咀新開咗間燒肉店，主打美國、日本、澳洲嘅和牛，客人可以自己燒返自己塊牛肉不特止，每枱仲有部自助啤酒機，連酒都可以自己斟！

呢間燒肉店，有多款牛肉部位選擇，單點又得、拼盤又得，仲有套餐選擇。特別推介A4無敵霜降和牛小排，同A4和牛西冷大牛排（厚切）。前者脂肪平均，入口即溶；後者肉味香濃，好juicy。

另外仲有A4牛魔野原燒，即係和牛薄切配月見汁沾蛋。塊和牛堅薄，輕輕燒一燒、反一反之後就搞掂。食之前撈埋蛋漿，口感幾rich，令到層次更加提昇。

牛魔王總係貪心嘅，牛魔終極拼盤就啱晒，一set可以試到五款唔同嘅部位：

 相對厚肉嘅A4岩鹽和牛牛肩肉

 爽口而牛味重嘅厚切和牛牛脷（脷心）

 澳洲M7和牛肉眼排（厚切）嘅肉味相當香濃

 美國Prime醬油牛肋骨肉味帶甜，好juicy

 和牛牛五花油脂豐富，肉質較堅韌

每枱仲有自助啤酒機，客人可以自己想飲幾多就斟幾多，暫時兩款啤酒選擇分別係Hoegaarden同Suntory，一啖燒肉一啖酒，爽。

唔想飲酒嘅朋友則可以以茶代酒，有款以cocktail方式演譯嘅檸檬茶，用普洱生茶做茶底，茶香味醇，帶有甜味，飲多兩啖就可以消除下牛嘅油膩感。

至於lunchtime得個零鐘燒唔切牛？唔緊要，有set menu。安格斯特選牛肉眼丼飯同溫泉蛋豚肉丼飯都係大大碗，滿滿der。

牛魔
地址：尖沙咀棉登徑8號地下5-6號舖

文、相、片：Kar