CBD係咩嚟？其實就係大麻二酚，唔少人一聽到「大麻」兩個字就驚咗，其實CBD喺香港係合法使用，有鎮靜及令人舒緩情緒等功效，近年亦開始有唔少餐廳將CBD加入飲品及食物當中。最近尖沙咀就新開咗一間CBD主題嘅多國菜，大廚Rex曾於知名中東菜及墨西哥餐廳工作，所以好多菜式都好有異國風味～
帶子蟹肉牛油果他他配薑油黑醋汁（$128）
前菜帶子蟹肉牛油果他他配薑油黑醋汁，上層選用帶子、蟹肉及明太子，而下層就係墨西哥式牛油果醬，再加入洋蔥、番荽、番茄粒製成，同時加入薑油僻走腥味及加醋提鮮，食完零舍開胃！
香烤威靈頓三文魚配秘魯黃椒醬（$198）
威靈頓三文魚係一道較易膩嘅菜式，所以醬汁方面有特意調配過，秘魯黃椒醬中加入少許水果製成，所以除咗有黃椒香氣外仲帶甜味，可以中和菜式膩感。
班尼迪蛋銀鱈魚配白酒芥末汁拌香蔥薯泥（$198）
大廚將一個英式 Fine dining菜式平民化～銀鱈魚簡單落鹽及黑椒煎香，而薯泥用加入蜜糖芥末、白酒、醋、牛油及香蔥等製成，味道和諧。
更多【新店直擊】： |
薩他羊架配楓香乳酪醬伴蘋果肉桂藜麥沙律（$248）
選用紐西蘭羊架，用中東式做法烹調再作改良。加入中東香料薩他、鹽及黑椒調味，羊架焗十五分鐘後放置，面層再加芥辣及麵包糠。底層嘅乳酪醬加入楓糖漿，可以掩蓋羊騷味 ，而配菜蘋果肉桂藜麥沙律好清新，加入鹽膚木粉後香料味更濃厚。
開心果青檸奶油芒果千層酥（$58）
千層酥最重要梗係個酥皮，餐廳用嘅皮特別薄身，土耳其式做法令到酥皮焗起會特別香脆又有空氣感。而奶油就加入白朱古力及青檸，濃香之餘，食晒成件都唔會覺得膩。
香烤白醬海鮮啤酒薯條（$88）
地址: 尖沙咀厚福街12-12A號藍馬商業大廈1樓
文、相: Yanica