日出康城嘅朋友等咗咁耐，最近區內終於開咗首間日式料理店！餐廳走高檔及精緻居酒屋路線，裝潢以懷舊復古嘅8、90年代日本文化為主調，天花板上嘅水晶魚形燈都好吸睛；食物方面由行政總廚石德明團隊主理，因為石師傅於小漁村生長，所以對選材方面有份執著，堅持選用最新鮮及最優質嘅海鮮。種類方面提供多款日本料理，如刺身、壽司、卷物、丼飯、小食、天婦羅、串燒、鍋物及甜品，大部份食材都由日本直送！香港人而家返唔到鄉吓，呢度絕對可以止吓癮。

白生魚薄切($158)

日本真鯛刺身再薄切，每一片都好薄身，味道有口感又鮮甜。

日本煙燻雞胸刺身($92)

提到雞肉刺身未必個個都敢試，呢度用蘋果木煙燻來自福岡嘅雞胸刺身，有種煙三文魚嘅感覺大家就易接受啲，醬汁用蛋黃醬及醋自家調製，作為前菜又幾開胃。

山一刺身盛($588)

想每款刺身都食到，山一刺身盛就啱晒！共有七款刺身，包括大拖羅、磯煮鮑魚、牡丹蝦、油甘魚、三文魚及兩款時令刺身，開飯仔當日就係罕有啲嘅金目鯛同北寄貝，款款都好新鮮。

香蔥吞拿魚卷($88)、軟殼蟹炸蝦卷($78)

卷物方面大推香蔥吞拿魚卷，吞拿魚人手剁成蓉，入口即溶！軟殼蟹炸蝦卷就一半係軟殼蟹一半係炸蝦，一次滿足兩個願望。

日本博多炸雞

同樣選用產自福岡縣嘅「博多地雞」，彈牙肉質雞味濃，而且仲炸得酥脆Juicy，醬汁都係自家製，蛋黃醬加上唐辛子，香辣惹味！

玉子豆腐沙律($68)

選用來自日本青森縣，蛋黃濃度高達14嘅雞蛋，經過70度慢煮後，滑溜蛋味香濃。

三文魚魚湯泡飯($88)

湯底用上十斤鯛魚骨熬六小時以上，鮮甜鯛魚味濃厚，加上脆粒又多一份層次感。

宮崎直送和果子($38/2pc, $72/4pcs)

甜品仲有由宮崎直送和果子，多以紅豆餡為主，款式就隨機嘅。

山一 

地址: 將軍澳康城路1號The LOHAS3樓319號舖

文: Yanica

相、片: Tom Li