行入九龍灣工廈區，唔難發現呢間位於當眼位置新開嘅台式外賣店，開咗無耐已經喺區內建立口碑，好受附近上班族歡迎！小食店主打台式混蛋吐司系列同埋即炸爆脆雞髀，仲有台式便當、烏冬及多款台式茶飲揀。
日式紫菜雞肉混蛋吐司
呢排香港興起各款韓式吐司，餐廳主打嘅台式混蛋吐司有三層吐司兩層餡料，吐司特意選用丹麥酥麵包，塗上牛油後用鐵板煎至外脆內軟，其中一層餡料加入滑蛋及蛋黃醬，另一層就係原塊雞排，餡料豐富，即叫即製熱辣辣。
韓式辣泡菜豚肉混蛋吐司
鍾意韓式口味，可以試呢款韓式辣泡菜豚肉口味。加入泡菜味道酸酸辣辣，食落零舍開胃。
雙味起司混蛋吐司
芝士控當然唔可以錯過，加入原塊芝士及芝士碎，「芝」味香濃！
更多【新店直擊】： |
原味爆脆雞髀
原味爆脆雞髀即時上粉生炸，選用日本直送麵包糠，炸皮香脆又夠薄身，雞髀都充滿肉汁～
吉野牛肉拼照燒鰻魚丼飯
想食飽肚啲，餐廳都有多款便當供應。好似呢個牛肉拼照燒鰻魚丼飯，照燒鰻魚厚肉、牛肉份量都好多，配埋多款蔬菜又健康啲。
黑糖桃膠鮮奶
黑糖珍奶就飲得多，呢度就用桃膠代替珍珠，女士養顏之選。
地址: 九龍灣宏開道15號九龍灣工業中心地下2A號舖
文: Yanica
相、片: Tom Li