喺旺角想飲杯精品咖啡或者食甜品又有新選擇啦，新店以型格又神秘嘅黑色為主調，唔單止裝修、餐具係黑色，連嘢食都係黑色！好似黑森林梳乎厘班戟，炸豬扒黑咖喱等。必試新出嘅麻糬窩夫，外脆內煙韌口感好豐富。
Black Coffee係土瓜灣HeySoNuts嘅姐妹店，旺角新店走簡約全黑風格，主打精品咖啡同手工甜品，亦有供應小食、All Day Breakfast同主食，唔少都係自家研發食譜。
Crispy Toast w/ Dipping Sauce（$58）
連多士都係黑色！其實係用竹炭麵包製作，配搭兩款沾醬。沾醬會不定期更換，拍攝當日係自家製黑蒜醬同鷹嘴豆泥，前者嘅黑蒜經過發酵，少咗辛辣味反而有陣酸甜香；後者係中東菜常見嘅食材，口感柔滑。
Tonkatsu Pork Chop w/ Black Curry（$108）
主食以西式同日式為主，呢份黑咖喱就類似味道帶甜嘅日式咖喱，香料味較弱，配埋薯仔同胡蘿蔔，係小朋友都可以試嘅咖喱。日式炸豬扒外面金黃香脆，裡面豬肉軟嫩。
Black Forest Soufflé Pancakes（$105）
即叫即製嘅梳乎厘班戟有唔同口味，呢款就以經典黑森林蛋糕為靈感，喺原味梳乎厘班戟上面加上朱古力慕斯、朱古力片、酒浸車厘子等，朱古力香濃郁而且唔過甜。梳乎厘班戟富空氣感同時唔會完全入口即溶，口感鬆軟濕潤。
Ginger Moffle w/ Roasted Coconut Shreds, Thai Sauce & Vanilla Ice-cream（$68）
Moffle係Mochi加Waffle，即係外表睇落以為係普通窩夫，其實係裡面係煙韌麻糬餡！靈感嚟自傳統番薯糖水，加入薑製作出薑味麻糬，食落外脆內煙韌又帶少少薑嘅辛辣香。配搭嘅冰凍嘅雲呢拿雪糕、烤椰子片同椰子味香濃嘅泰式醬汁，估唔到又幾夾。
更多【新店直擊】： |
Peach Sparkling Coffee（$48）
店名叫得Black Coffee又點少得咖啡呢？呢杯Peach Sparkling Coffee無落到桃，而係用一款特別嘅咖啡豆，配搭糖漿同梳打水沖出類似桃咁嘅甜香。除咗甜味，仲有陣類似山楂嘅酸味，酸酸甜甜咁加上氣泡口感，非常消暑。
Hand Drip Coffee（時價）
手沖咖啡用嘅單品咖啡豆會不定期更換，有同香港咖啡烘焙師合作，亦有從世界各地引入嘅。拍攝當日呢款係埃塞俄比亞日曬咖啡豆，聞起嚟帶花香同黑糖香，酸度中等，口感厚滑。
Black Sugar Hojicha Latte（$39/熱，$45/凍）
唔飲咖啡嘅話亦有多款特飲，襯返黑色嘅有呢杯Black Sugar Hojicha Latte，選用日本京都宇治焙茶粉，茶香濃郁而且有烘焙香味，同帶焦糖香嘅黑糖好夾。
Black Coffee
地址：旺角廣華街3號地下3號舖
文：Cathy
相、片：Calvin Kwok