提起漢堡，唔多唔少都總會有唔係好健康嘅印象，但其實只要識揀，漢堡都可以食得健康無負擔！好似西營盤呢間新店就主打均衡概念，可以選擇要牛肉漢堡扒或者自家製素漢堡扒，貪心啲兩樣都要又得，口味多變日日食都唔會厭。
 

Mirror Burger位於港鐵西營盤站附近，以Balance Lifestyle為主旨，漢堡主要分為Guilty（牛肉）同Guilt-free（素食）兩類，亦有介乎兩類之間嘅，可以按自己喜好同需要選擇。唔少食材都係自家製作，好似酸瓜就改良至啱香港人口味，用白酒醋醃漬而且加入鬼椒，酸辣平衡唔嗆喉。
 

鏡漢堡（$79，連飲品薯條+$19起）

招牌漢堡就有齊牛肉漢堡扒同者自家製素漢堡扒，前者係用USDA認證嘅美國牛肉製作，當中有75%瘦肉，4oz重保證有肉香又唔會食到成嘴油。後者就主要以番薯、紫薯、紅腰豆、鷹嘴豆製作，無防腐劑無添加。裹上蛋漿同燕麥再炸，外脆內鬆軟，咬落有時仲有原粒紅腰豆後者番薯塊嘅口感，幾過癮！
 

除咗兩大塊扒，仲有火箭菜、羅紗紅生菜（Rosso Lettuce）、蕃茄、洋蔥、芝士、紅酒洋蔥醬、自家醬汁。而麵包就搽咗牛油同加咗迷迭香嘅芥花籽油，食落鬆軟微甜之餘，仲有少少香草香氣，同牛肉漢堡扒亦好夾。而牛蒡係每日新鮮人手刨絲，新鮮炸好就咁加少少鹽就好香口。
 

牛油果軟殼蟹漢堡（$98，連飲品薯條+$19起）

鍾意香口嘢嘅朋友必點！大大隻軟殼蟹炸至金黃酥脆，亦鎖住海鮮鮮味，同一片片柔軟嘅牛油果係絕配。再加上他他醬、火箭菜、紅生菜、蕃茄，清爽解膩，同時增加口感層次。炸番薯條外脆內軟，味道香甜。
 

香辣芝士牛肉漢堡（$68）

而呢款就啱重口味或者鍾意食辣嘅朋友，除咗牛肉漢堡扒，另一主角就係餐廳自家製煙燻墨西哥辣椒醬加上醃墨西哥辣椒粒，味道香辣！本身牛肉漢堡扒加埋半融芝士同一樣係自家製嘅紅酒洋蔥醬已經好香，加埋辣椒更加惹味。
 

煙三文魚煎蛋堡（$49，早餐及下午茶限定，連飲品+8起）

早餐或者下午茶想食Light啲，就可以點呢個煙三文魚煎蛋堡。柔嫩富油香嘅煙三文魚落得夠重手，加埋燶邊嘅煎蛋、火箭菜、紅生菜同自家醬汁，同帶微甜嘅麵包一齊食味道啱啱好。
 

Mirror Burger 
地址：西環皇后大道西194號地舖

文：Cathy
相、片：Tom Li