以前講起食齋，好多人第一個感覺諗起就係「好dry喎」、「好清喎」、「冇啖好食喎」，但隨住時代嘅改變，近年愈嚟愈多人推崇素食文化，一為健康、二為環保、三為宗教等。香港亦多咗好多素食餐廳，而素食餐單亦變得日益多元、豐富。

就好似喺香港有多間分店嘅大自然素食咁，由SARS時期開張至今，都時不時每個月有幾道新菜式推出，最近新出嘅就有沙薑西洋菜、芫荽麻香皮蛋、梅菜扣肉、鰻魚煲仔飯同情迷脆豆腐。

沙薑同西洋菜好似大欖都扯唔埋，沙薑就煮雞㗎嘛，西洋菜平時通常都係煲湯呀、打邊爐呀或者用蒜蓉炒，但老闆和哥表示「齋舖唔落得蒜蓉，咁用返薑絲炒又冇咩咁特別，用沙薑就惹味嘞」，呢個創新組合又幾特別。

平時食開嘅皮蛋都係黑麻麻，但呢道芫荽麻香皮蛋係透明金黃色嘅？原來全世界淨係得四川先有呢隻皮蛋咋，全天然嘅，和哥都係透過四川嘅朋友直接入貨。陳志雲試食後表示好彈牙，食嗰陣完全唔需要點糖或者加薑，冇澀味㗎。

梅菜扣肉無論望落去、夾落去同食落去都同真嘅肥豬肉十級似，軟腍冇渣，配埋梅菜好送得飯。和哥透露瘦肉係用大豆纖維，而肥豬肉就係用卡德蘭膠做嘅。

天氣凍凍地，最啱就係食煲仔飯。呢間齋舖都有煲仔飯食，仲要係鰻魚煲仔飯……咁梗係唔係真鰻魚啦，但又係似到十足十，「魚皮」係紫菜嚟，淋埋燒汁夠晒香，記得要食埋啲飯焦呀，精髓嚟。

最後要介紹嘅情迷脆豆腐，係陳志雲創作嘅。先將豆卜反轉，釀入軟身嘅豆腐，加埋冬菇碎同芫荽就拎去炸，面頭淋埋千島醬或者沙律沙，再唔係想要辣啲嘅，落泰國甜酸醬都得。豆腐外脆內軟，Stephen形容食落感覺似臭豆腐，但就冇臭豆腐嘅臭味，人人都啱食。

曾經完全茹素18年嘅陳志雲認為食素有唔少好處，除咗令腦筋清醒啲、冇咁易攰同眼瞓，加上唔使用咁多力去消化而對腸胃好啲之外，最緊要係對皮膚都好啲，「皮膚靚咗好多，睇落唔似60歲吖。」另外佢亦認為食素令自己嘅生活態度都有唔同，會對生命多咗一份尊重。「生活態度上嘅選擇，當你食素時，就會『係喎，我需唔需要去屠宰咗嗰個動物嚟為自己嘅生計呢？』有時係唔需要，甚至有啲更好嘅選擇。」

大自然素食
地址：尖沙咀彌敦道132號美麗華廣場一期2樓212號舖
其他分店地址   按此