雖然仲未feel到涼意，但秋冬就快到，又係時候瘋狂打邊爐喇！有時得一個人想食起上嚟，快餐店一人火鍋就係救星！一粥麵最近推出咗全新粥底蒸鮮鍋，用特製一層鍋，海鮮配料有得蒸有得烚，等開飯仔同你解構試味先！

今次呢個一人前粥底蒸鮮鍋有三款，新嘅龍躉海蝦肥牛鍋($72)及帆立貝手打三寶丸肥牛鍋($72)會輪流推出，而去骨花雕醉雞雜錦鍋($59)，就係全階段供應。魚湯粥底本身有味道，以鯛魚、豬骨、雞腳等熬成，粥底比一般稀，容易烚熟食物。鍋爐係特別訂造，有半層可以蒸配料，底部有孔，精華就會流入粥底中，更加鮮甜。

率先推出嘅龍躉海蝦肥牛鍋，有兩片龍躉、一隻蝦、一碟肥牛，另有豬膶、鮮蝦雲吞、魚片頭、油炸鬼、粟米、冬菇、生菜及烏冬，其實都幾豐富。龍躉肉厚，都幾鮮甜，試過隔水蒸及放入粥底烚，個人覺得烚有粥水包住，質感滑啲。蝦就隔水蒸鮮甜啲，但需時比烚長得多。

21/11先推出嘅帆立貝手打三寶丸肥牛鍋，帆立貝連殼就蒸比較好，大約十零分鐘食得，厚肉鮮甜，有啲驚喜！蒸完出來的精華，當然唔好浪費，倒入粥底就會越滾越鮮！墨魚丸、豬肉丸同鯪魚球係手打，真係彈牙喎。

醉雞鍋就有一大碟雞肉配兩塊脆肉鯇，雞肉幾滑但酒香唔算重。其他配料都幾新鮮，最緊要係最後果碗粥，有齊海鮮肉類嘅精華，最好唔好加湯溝淡呀，幾飽都一定要食埋佢！唯一缺點係冇包飲品，可以另加錢換珍寶裝飲品。

只於一粥麵其中38間分店供應，部份分店包括灣仔海港中心、和富中心、佐敦道、黃埔花園、葵涌商場、沙田第一城等，詳情可以致電2601 8158查詢。

文、相、片：Perrins