各位充滿少女心嘅女士們注意，又有一間新嘅打卡餐廳要Bookmark喇！今次係來自泰國曼谷、傳統泰菜Nara Thai Cuisine嘅姊妹品牌、以夢幻粉紅色作主題嘅超人氣餐廳Lady Nara，選址尖沙咀海港城。新店仲會首次公開其中一位創辦人Narawadee Srikarnchana（Yuki）過往在家研發的私房食譜，係香港店先有嘅限定菜式！
室內設計以典雅綠配上粉紅色，水吧枱用上淡淡嘅粉紅水磨石鋪設，仲有同總店一樣嘅菱形鏡牆，一張打卡專用嘅藤造鞦韆，夢幻得嚟又坐得舒適。
龍蝦冬蔭意粉（香港限定）（$168）
香港先有得食嘅龍蝦冬蔭意粉！用冬蔭龍蝦湯、龍蝦肉、番茄莎莎、鯷魚等炒香，惹味得嚟仲帶有龍蝦嘅鮮香，必試之選。另外一款冬蔭限定菜式係招牌冬蔭龍蝦湯配蒜蓉包，一樣咁鮮味！
香茅燒雞（香港限定）（$328）
選用原隻黃油雞，先用魚露、青檸汁、香茅等18款香料醃製過夜，然後再將新鮮香茅釀進雞腔中，以180度烤焗半小時，出爐一刻勁香！肉質嫩滑多汁，而且香料味濃厚。
芝士肉醬粟米片（$98）
除咗限定菜式外，當然唔少得幾款總店鎮店菜式，芝士肉醬粟米片以墨西哥粟米脆片配搭泰式打拋豬肉，加埋三款醬汁包括菠蘿莎莎醬、東北辣椒醬及牛油果醬等，香脆又惹味。
菠蘿牛肉他他配甜酸蛋黃醬（$128）
而菠蘿牛肉他他配甜酸蛋黃醬係著名法式牛肉他他變奏版，特地選用軟腍嘅牛肩排，加入自製香辣蛋黃醬、菠蘿粒等手剁而成，比起普通嘅牛肉他他多咗一份酸香層次。
更多【新店直擊】： |
軟殼蟹和牛漢堡配薯條（$168）
自家製的和牛漢堡扒配上香脆嘅炸軟殼蟹、冬蔭功蛋黃醬、酸甜雞醬、車打芝士等，一入口無論口感定味蕾都超豐富！
泰式奶茶意大利芝士餅 （$88）
朱古力曲奇雪糕三文治（$68）
玫瑰泰奶茶（$48）、香茅蝶豆花梳打（$48）
地址: 尖沙咀廣東道3-27號海港城港威商場3樓3303號舖
文: Yanica
相、片: Tom Li