自從網上流傳中成藥連花清瘟膠囊（以下簡稱連花）有抗疫效果，好快就畀市民搶購一空，但亦有人表示服用後身體不適。話晒連花係藥嘅一種，要對應病症同體質服用。開飯仔請到中醫師黃曦民解構呢隻藥嘅功效，以及邊幾類人忌食，咁就唔怕食錯啦～

1) 連花係用作治療定預防呢？
答：「是藥三分毒」，自古以來醫家視一切藥物為毒藥，以藥嘅偏性糾正體內失衡嘅狀態，「以偏糾偏」。用作治療嘅連花亦唔例外，藥性偏寒，係用作治療嘅藥物，並非預防。

2) 係連花定蓮花呢？
答：連花嘅命名係指由連翹同金銀花為主嘅中藥所組成，所以同蓮花無關。加上蓮花性溫，功效為活血止血、祛濕消風，同屬於性寒涼、功效為清熱解毒嘅連翹、金銀花完全唔同。 

3) 連花嘅功效主治咩呢？
答：佢嘅有效成分為連翹、炙麻黄、金銀花、板藍根、綿馬貫眾、廣霍香、紅景天等，有清瘟解毒，宣肺泄熱功效。主要用於治療流行性感冒屬熱毒襲肺證，症見發熱、惡寒、肌肉酸痛、鼻塞流涕、咳嗽、頭痛、咽乾咽痛、舌偏紅、苔黃或黃膩。

4) 連花有咩禁忌？
答：風寒感冒、體質虛弱、容易腹瀉、孕婦同G6PD患者忌服。

5) 市民應如何使用連花？
答：無論係邊款中成藥或中藥，因為藥有偏性，使用前建議先諮詢註冊中醫師意見，並按照醫囑服用。胡亂服用中藥，藥效無法正常發揮，重會對預防者、患者嘅健康造成損害。

抗疫小百科（中醫篇）解構診療過程+中藥如何減輕病情：（按此）

預告：黃曦民醫師下星期會推介幾款居家防疫食品，以及強身健體嘅防疫功法，記得留意我哋嘅更新喇～