呢個夏天最多人飲嘅，應該就係台式飲品！最近呢間台灣過江龍喺油麻地開分店，推出新店獨家嘅黑磚，同黑糖珍珠有咩分別？開飯仔去新店幫大家試下先！
 

了不起總店喺台中，繼香港大學分店後，最近過海嚟到油麻地開分店，分店仲有幾個座位畀大家坐低飲茶兼打卡。新店仲新增黑磚系列同沙冰系列呀。
 

黑糖黑磚鮮奶（$28）

黑磚暫時係油麻地店限定，而黑磚其實既係品牌自家製嘅焦糖啫喱，呢杯黑糖黑磚鮮奶就先落焦糖啫喱，加黑糖醬同冰，最後倒入澳洲鮮奶。打完卡記得搖勻先好飲，焦糖啫喱食落口感比一般啫喱軟少少，雖然無仙草凍咁滑但都好容易吸到，焦糖香突出而且相當入味。黑糖鮮奶勝在黑糖香自然，不過同焦糖啫喱一齊飲就略嫌甜咗啲，怕甜嘅話就搵個甜魔朋友Share飲啦。
 

芭樂檸檬翡翠（$36）

想清新啲嘅話可以揀返原味茶或者水果茶，佢地水果茶嘅特色係已經切成細細粒，用粗硬管就吸到，唔洗打開蓋用叉食！好似呢杯芭樂檸檬翡翠用咗台灣紅心芭樂，加泰國青檸汁同茉莉綠茶打成吸引嘅紅色，飲落有少少顆粒感。甜味天然適中，無蓋過綠茶清香，仲咬到一粒粒紅心芭樂果肉！
 

 

奶蓋翡翠（$30）

而海鹽芝士粒粒奶蓋系列，顧名思義即係奶蓋飲落會有粒粒口感！因為用嘅係店家自己用法國忌廉、法國Cream Cheese同少少海鹽打成嘅奶蓋，而唔係用奶蓋粉開出嚟，特別保留少少芝士粒粒之餘，飲落口感仲特別濃厚呀。建議唔好用吸管搞勻，就咁打斜個杯飲，咁就飲到芝士奶蓋同茶嘅兩層唔同口感同味道。奶蓋的確係幾厚身，啲啲鹹味帶出芝士香。而翡翠即係店家嘅茉莉綠茶，茉莉花香突出，配合綠茶嘅微甘特別Refreshing。

最後特別提提大家品牌有調整過甜度，除咗黑糖黑磚鮮奶會偏甜少少之外，其他大部分飲品嘅正常糖等於坊間嘅少糖！所以第一次飲嘅話建議嗌返正常糖或者少糖，當然真係覺得太甜嘅話，下次就可以再調整啦。

了不起
油麻地彌敦道534號嘉榮大廈地下3A號舖

文、相、片：Cathy