新年糕點巡禮~ OMG！年糕都有芝士、紫薯味？

雖然大家都知，食年糕並唔係真係會年年高，但係食糕已經成為咗新年嘅傳統，每年新年都總係會有幾底唔同款嘅糕食，年糕蘿蔔糕馬蹄糕乜乜乜，相信今年都唔會例外。而家就同大家一齊做個糕點巡禮，「猴」下有啲咩特別款式先~~~ Go！Go！Go！

猴子抹茶年糕

邊個話年糕一定要係圓形或者方形？嚟緊係猴年，咪整返款猴形年糕應下節囉。呢5隻橙紅、淺綠、奶白、棗紅同粉紅嘅馬騮仔，係5種唔同口味嚟㗎，有甜有鹹，分別係傳統紅糖椰汁、抹茶、車打芝士、黑楓樹糖漿同日本紅豆椰汁！細細件咁的的式式，唔怕滯嘛。

查詢及訂購：

沙田萬怡酒店
電話：3940 8788
價錢：$68三件、$118六件
訂購日期：即日至2月14日（1月31日前訂購及付款可享9折優惠）

滋潤金絲貢棗糕

除咗喺造型方面有創新，口味一樣有。就好似呢款金絲貢棗糕咁，大大粒棗置中，賣相同普通年糕冇咩分別，不過食落就知佢嘅矜貴同特別嘞：話明係貢棗糕，當然好有棗味，不過值得留意嘅係佢嘅營養價值，補血益氣，有助改善皮膚色澤呀！另一款同樣都係滋潤進補嘅，係金箔燕窩桂花糕，喺陣陣嘅桂花香味底下，仲可以食到名貴嘅燕窩同埋金箔添呀！嗱，食糕唔一定係肥嘅，養顏都得。

查詢及訂購：

富豪機場酒店電話：2286 6238
富豪香港酒店電話：2837 1748
富豪九龍酒店電話：2313 8718
富豪東方酒店電話：2132 3502
麗豪酒店電話：2132 1011
價錢：金絲貢棗糕（$198）/ 金箔燕窩桂花糕（$208）
訂購日期：即日至2月5日

即食桂花杞子棗皇糕

如果嫌下下都要開鑊煎糕有啲麻煩嘅，可以考慮下呢個即食嘅凍糕，雪咗入雪櫃之後，幾時肚餓或者口痕，隨手就可以拎出嚟切片食，既方便又快捷。糕身爽口，夾埋清香嘅桂花同甜甜地嘅棗蓉，唔使驚太寡，都唔使驚會太滯呀喂。

查詢及訂購：

美心翠園
電話：2101 1333
價錢：$102 （零售價：$138）
註：滙豐信用卡7折優惠：$96.6/個（優惠期至1月31日）

人氣芝士、紫薯年糕

要數年度人氣食品，一定非芝士同紫薯莫屬，佢哋嘅人氣由上年紅到落嚟今年，世人已經唔可以阻止佢哋嘅威力，入侵晒甜品同正餐界之後，而家仲攻入埋年糕嘅巿場！用新鮮紫薯粒同沖繩黑糖製成嘅紫薯黑糖年糕啖啖紫薯嘅清香，口感豐富。而和式年糕就用上巴馬臣芝士製作，再夾多層日本獲獎嘅拉可雷特芝士，合體變成芝士年糕，輕輕煎一煎嚿年糕就畀熱溶芝士包圍住，噢，好香，同時都好邪惡！不過一年先得嗰一次，唔理得咁多喇！

查詢及訂購：

東海堂
電話：2101 1333
價錢：$83起（零售價：$120起）
註：滙豐信用卡65折優惠：$78起（優惠期至1月31日）

文：Kar

隨時接收最新資訊
讚好OpenRice專頁！