葵廣茶飲店開到成行成市，無返啲特色又點突圍而出呢！今次介紹嘅唔係咩珍珠奶茶，而係一間新開嘅鮮果茶飲店，水果每日由果欄運到，所有飲品都係用鮮果即叫即製，榨成鮮果汁後再調製成一系列果茶果奶，而且每杯都有約150-200g嘅水果！下次去又多個掃街熱點啦～

靜岡蜜瓜奶($31/增量+$7)*所有圖片為增量裝

蜜瓜同奶一向都係最佳配搭，所以呢杯靜岡蜜瓜奶係必試之選！靜岡蜜瓜於溫室培育，所以全年都係當造期，靜岡蜜瓜屬於青肉蜜瓜，味道特別清甜，配埋店舖自己調製嘅鮮奶，好滿足！

九州藍莓奶($31/增量+$7)

用藍莓搭配奶喺坊間真係好少見～九州藍莓每粒都好飽滿，酸酸甜甜嘅藍莓同牛奶估唔到又幾夾。

馬來西亞木瓜奶($31/增量+$7)

木瓜奶同樣都係傳統配搭！馬來西亞氣候特別適合種植木瓜，所以特意選用，木瓜味道濃郁，而且清甜多汁，飲落木瓜嘅aftertaste好重～

香印青提茶($28/增量+$7)

至於果茶方面，所有都係四季春茶底。香印提子大粒飽滿，味道香甜，配上茶底味道更清新，少咗平時提子涸喉嘅感覺。

大糖領桃茶($25/增量+$7)

日本水蜜桃一向出名清甜多汁，而大糖嶺並唔係一個地方，而係日本水蜜桃嘅等級名稱，大糖嶺比特秀高一級，真係又甜又多汁㗎，配埋茶底又多咗份茶昋～

菓屋

地址: 葵芳葵富路7號葵涌廣場2樓C76B號舖

文: Yanica

相、片: Tom Li