雖則話晚市堂食已經恢復，但總唔夠日日都出街食又或者餐餐都靠兩餸飯度日嘅~今次會同大家睇睇有咩食材可以掉落鑊即煎即食，希望大家無論月頭定月尾都有啖好食！
墨魚餅 / 蝦餅
圖：HKTVMALL ｜點泰式辣醬好惹味🤤
呢類「點心」用嚟加餸真係一個非常好嘅選擇，買返屋企解完凍真係咩都唔使處理，就咁落油開鑊煎即可！想香口啲，我屋企會落好輕手嘅椒鹽（記得試真自己買嗰包本身隻味會唔會已經好濃先好落。）
牛油帶子
圖：帶子其實都係我家中常備凍貨，事關佢用嚟快手炒西蘭花又得，加落意粉度甚至伴住牛扒/羊架食都得！根據經驗，咩煮法都好，帶子都會縮，如果唔想佢縮到變貝柱，請各位真係花多少少錢買大粒嘅！優質少少嘅帶子輕輕解凍（唔完全等到變淋晒都得，但唔可以係成粒冰咁款）後，用牛油開鑊大火煎一煎兩邊，有少少金黃色最好，冇都唔使強求。之後大家記得校返最細火，可以按個人喜好落啲香草/黑椒，輕輕煎多一陣就好上碟！（煎嘅時間真係好睇SIZE同解凍程度，煎多幾次就熟手！）
帆立貝
圖：HKTVMALL
帆立貝同帶子唔係同一樣嘢咩？全能嘅Google大神答咗我：唔係！咁煮帆立貝又同帶子有咩分別？首先我唔會拎帆立貝去蒸先囉。帆立貝我都會拎嚟同蘆筍/西蘭花炒，但其實佢自己就咁用燒汁煎都已經好好食~
玉子豆腐
圖：唔知大家屋企係點整玉子豆腐？我自己就鍾意一係加帶子蒸，一係就加生粉煎都脆卜卜，貪佢香口得嚟，夾又唔易散又可以帶飯！做法都係切粗片（太薄真係未煎都散咗），兩邊都鋪層生粉上去，再即刻落鑊煎，煎緊時加啲鹽/椒鹽，唔好不停咁反轉，煎到變金黃色/明顯外層變脆就可以夾起。
三文魚
圖：shopify
三文魚營養咁豐富，自己煮平均一人份量都係$25甚至以下，加上又唔難處理，學識整之後我自己真係除咗刺身/壽司之外，都冇咩幾可再畀錢出面食煎/焗三文魚嚕~ 三文魚基本上都係解凍完用鹽/黑椒醃15分鐘左右，落鑊煎記得皮向下（冇皮就是但一邊啦），煎到可以輕鬆剷起時就換邊煎同可以再落調味料例如香草，煎到各表面都變晒色，再皮向下煎多一陣 （視乎三文魚大細） ，就可以得出一嚿脆皮三文魚❤！
另一種三文魚煎法就偏中式，煎前唔使特別醃，係最好放落鑊前輕輕拍啲生粉等佢冇咁易黐實隻鑊。煎好後上碟，即刻再用同一隻鑊（唔使洗）煎香少少蔥絲，放返上三文魚上再落豉油同糖就食得。
文：Apple