日本連鎖燒肉店牛繁繼2018年於尖沙咀開設香港首間分店後，兩年後終於進駐荃灣開分店喇！餐廳一直貫徹總店理念，以親民價錢提供高質食材，新店除咗供應一系列經典菜式，如內臟盛合、豪華海鮮盛合及厚切鹽香牛舌等，仲推出全新菜式如牛繁燒及CP值極高嘅多人套餐等，想念日本燒肉味道嘅朋友ready好未？

牛繁燒($88)

新店首推嘅牛繁燒，將薄切澳洲M9和牛略燒10秒，再蘸上日本玉子及醬汁，肉質軟嫩、油脂甘香，味道甜甜鹹鹹好開胃。

四至五人前豪華套餐($1628)

餐廳有供應二至六人嘅燒肉套餐，性價比都幾高吓。好似呢個四至五人前豪華套餐，就已經有齊七款靚牛，包括日本霜降黑毛和牛西冷、極上M9霜降和牛肩翼板扒、特上M9和牛肉眼扒、上級里脊肉配月見汁、厚切牛舌、特上牛胸腹肉及特上牛五花，另外仲有自選豚肉、雞肉、海鮮、野菜盛合、前菜及沙筆，份量超多！

日本霜降黑毛和牛西冷呈粉紅色，紋理可見油花超豐富，肉質軟腍，一入口即溶，感受到滿滿牛脂香。

極上M9霜降和牛肩翼板扒及特上M9和牛肉眼扒，前者油脂分佈均勻，恰到好處，後者肉味較濃郁。

除咗牛肉，雞肉及豚肉可以七選三，特別推介雞肉菜式，食材均由日本直送，來自北海道嘅櫻姬雞頸肉，呢個部位活動量大，令肉質彈牙有嚼勁；而櫻姬雞腿肉就嫩滑；仲有新瀉雞皮，質地較一般雞皮彈牙，燒起脆卜卜且充滿油香，一啲都唔油膩，配上特調香蔥，送酒必備。

海鮮就五選二，比較特別啲嘅有原條蒲燒鰻魚同北海道甲羅燒。

多款前菜、沙律及野菜盛合。

食燒肉又點少得啤酒？牛繁首創焦糖奶油啤酒($58)，以Sapporo生啤配上自家製焦糖奶油，焦糖奶油香甜，好似棉花糖咁綿密，底下就係清爽嘅生啤，層次勁豐富！

牛繁  

地址: 荃灣大河道100號海之戀商場2樓2025號舖

文、相、片: Yanica