呢間來自大阪嘅日本過江龍頑固壽司，首間香港分店早幾個月已進駐尖沙咀，人氣有增無減！餐廳超過九成以上嘅食材，由時令海鮮、日本醬油、麵豉等調味，均由日本直接入口，務求令食客體驗到正宗日本風味。最近仲推出由日籍主廚Muneta主理嘅晚市廚師發辦套餐，$720就食足18道菜，都咪話唔抵啊！
晚市廚師發辦套餐($720)
廚師發辦套餐融入咗懷石料理元素，包括三點前菜、茶壺湯、刺身、壽司、燒魚、時令料理、茶碗煮等共十八道菜。以每次三件嘅形式呈上，分成三輪，中間穿插湯、熟食等。溫馨提提大家會根據時令而供應不同食物~
前菜包括螢光魷魚配醋麵豉、菜之花配Wasabi醬油及燒平貝配山椒葉醬，等大家開個胃先。之後櫻花𩶘魚土瓶蒸加入𩶘魚及三種日本菇，包括本菇、冬菇及雞脾菇，味道偏淡，清清味蕾預備食下一道菜。
刺身一嚟先上個海螺配蜜柑啫喱，味道清新。跟住就到香港人至愛嘅燒大拖羅，大拖羅入口即溶，而且有別於以往點日本醬油嘅食法，配上七味醬及柚子胡椒醬，味道更有層次感。
三款壽司平目魚、中拖羅壽司及深海赤鯥，赤鯥屬於高級魚，魚味濃、油份重以及較腍身。
食壽司中間穿插鮟鱇魚肝配梅七味醬及櫻花蝦天婦羅+山菜，食客可以轉換吓口味。
針魚配紫酥葉，多咗紫酥葉香氣，比較清新及爽口。鰤魚腩輕輕燒過，配上蘿蔔又無咁膩，仲有加上金箔嘅白蝦壽司添～食完呢三款後又會上個金目鯛櫻花蒸畀大家清清味蕾。
跟住到燒左口魚壽司、北海道馬糞海膽及柚子大根壽司，最後的柚子大根壽司味道清新，畀大家可以一解食多咁多味菜嘅膩感。
呢個雞蛋玉子燒將蝦、白身魚、蛋同淮山打成蓉，再將蛋白打成泡後拎去焗，口感偏向似蛋糕。最後食埋個甜品黑糖蕨餅可謂完美的一餐！
晚市壽司12貫($320)
另外晚市都有單點嘅壽司套餐，如呢個晚市壽司12貫就可以食齊牡丹蝦、北海道馬糞海膽、鰤魚、鰻魚、三文魚子、帆立貝、平目魚、吞拿魚中拖羅、吞拿魚大拖羅、金目鯛、蔥拖羅卷及玉子燒，啱晒咩都想試嘅朋友！
至於午市，除咗有壽司套餐外，都有丼飯選擇㗎～好似海鮮丼定食($198)及鰻丼定食($138)，仲會跟一個茶碗蒸、小鉢及味噌湯，午市想食好西都無問題！
地址: 尖沙咀河內道18號K11購物藝術館1樓106號舖
文: Yanica
相、片: Tom Li