憑招牌北京烤鴨煎餅而紅遍天后嘅「老COME廚房」終於衝出天后，去到旺中開分店，令旺角友都可以試到勁多料嘅招牌煎餅。新分店亦推出以北京烤鴨做底嘅幾款北京X港式煎餅，一於睇睇乜料先！

如果你未食過「老COME廚房」，一定要先試下招牌北京烤鴨煎餅($38)。煎餅做法參考傳統天津煎餅再加入香港特色配料而成。

首先將綠豆做成嘅粉漿倒喺煎餅爐上，然後推開成煎餅狀；再加入雞蛋，令蛋汁均勻地落喺煎餅上。

加入口感清新嘅香蔥後就將煎餅翻面，塗上專配烤鴨嘅惹味海鮮醬，再按次加入芫莤、青瓜及薄脆。

最後捲起煎餅，成形就完成。

內餡嘅北京烤鴨預先起骨，剩低全部係啖啖肉，並以海鮮醬調味，味道濃郁啲，食起來亦方便啲。

口感層次都幾豐富，先食到脆卜卜嘅薄脆，仲有帶少許煙韌又夠薄嘅煎飯皮，再食到惹味烤鴨，好正！以開口紙袋裝住，一邊行街一邊食煎餅，好方便。

介紹完店子招牌，另外仲有旺中限定嘅幾款煎餅，有北京烤鴨拼肉鬆煎餅（下圖）、芝士鴨煎餅及火腿鴨煎餅，係咪好有北京X港式fusion呢？三款價錢均為$42。

做法與剛才相若，不過加入肉鬆，味道食落更多一分香。美中不足嘅係，食完比較口乾，搭多杯豆漿就perfect啦！

而且客人可要求店子將煎餅一分為二，方便同朋友開心share，好貼心。

除咗北京烤鴨，呢度仲為一眾素食人士特設素菜煎餅，材料都係綠豆粉漿、雞蛋（可選擇剔除）、蔥等，而醬汁就會用自家調配嘅南乳醬，味道同樣帶鹹香。

店子計劃嚟緊會推出每月限定嘅煎餅，口味會不時轉換添！

老COME煎餅
地址: 旺角彌敦道688號旺角中心1期1樓F88A號舖

文：Joy